རྐང་ལམ་ཕྲ་མོ་ཞིག་ནས་གཞུང་ལམ་ལྟ་བུར་འཁྲིད་ཐབས་ལ་མི་འགྲོ་དང་ལས་གཞི་གཉིས་ཀ་སྤར་དགོས།

Kunga Gyaltsen

བཅར་འདྲི་ཞུ་ཡུལ། ཀུན་དགའ་རྒྱལ་མཚན།
བཅར་འདྲི་ཞུ་མཁན། སྐར་ཁུང་དྲ་བ།

༡)
དྲི་བ།
བཙན་བྱོལ་དུ་བོད་ཡིག་ནང་བྱིས་པའི་རྩོམ་རིག་གི་རྒྱུ་ཆ་མང་པོ་མེད་པའི་དཀའ་ངལ་གང་ལ་ཐུག་གམ།

དྲི་ལན།
བཙན་བྱོལ་དུ་བོད་ཡིག་ཐོག་ལ་བྱིས་པའི་རྩོམ་རིག་གི་རྒྱུ་ཆ་མང་པོ་མེད་པ་དངོས་འབྲེལ་རེད། འོན་ཀྱང་རྒྱུ་ཆ་མང་པོ་མེད་པ་དེ་ཐོག་མའི་ཆར་ལ་དཔལ་འབྱོར་གྱི་དཀའ་ངལ་དང་མི་ཆའི་དཀའ་ངལ་གཉིས་ཀ་ལ་བརྟེན་ནས་ཡོང་སྲིད་པ་རེད། འོན་ཀྱང་ད་ཆ་ལོ་ངོ་ལྔ་བཅུ་ལྷག་ཙམ་གྱི་བཙན་བྱོལ་བོད་མིའི་སྤྱི་ཚོགས་ཀྱི་གཞུང་སྒེར་གང་ཐད་ནས་དཔལ་འབྱོར་གནས་སྟངས་གང་འཚམས་ཡག་པོ་ཆགས་ཡོད་པ་མ་ཟད། གཞུང་འབྲེལ་ལས་གཞི་ཁག་ལ་རོགས་སྐྱོར་གནང་མཁན་མི་ཉུང་བ་ཡོད་པས། རྒྱུ་མཚན་དེ་བཀོད་ན་རྒྱུ་མཚན་ལྟར་སྣང་ཆགས་ཀྱི་རེད། འོ་ན། བྱིས་པའི་ཀློག་ཆས་རིགས་ཉུང་དྲགས་དོན་གང་ཡིན་ནམ་ཞེ་ན། རྒྱུ་མཚན་གང་འཚམས་ཡོད་ངེས་རེད། (more…)

འདི་འདྲ་མི་ཚེའི་ནང་སྔར་ཡང་བྱུང་མ་མྱོང་ལ་ཕྱིས་སུའང་འབྱུང་ཁག་པོ་ཡིན།

Hortsang Jigmey

བཅར་འདྲི་ཞུ་ཡུལ། ཧོར་གཙང་འཇིགས་མེད།
བཅར་འདྲི་བྱེད་མཁན། སྐར་ཁུང་དྲ་བ།

༡)
དྲི་བ།
ཁྱོད་ལ་མདོ་སྨད་ལོ་རྒྱུས་ཆེན་མོ་འབྲི་བའི་ཐོག་མའི་ཀུན་སློང་དེ་ཇི་ལྟར་སྐྱེས་བ་ཡིན་ནམ།

དྲི་ལན།
སྨན་རྩིས་མཐོ་སློབ་ཁང་གི་དགེ་རྒན་བྱེད་སྐབས་ཏེ་སྤྱི་ལོ་༡༩༩༤ ལོར་མདོ་སྨད་ཀྱི་ལོ་རྒྱུས་སྐོར་ལ་དོ་སྣང་གང་འཚམ་བྱུང་། དེའི་རྐྱེན་གྱིས་མདོ་སྨད་ཆོས་འབྱུང་ཞིབ་ཀློག་ཚར་གཅིག་བྱས་པ་ཡིན། འོན་ཀྱང་སྐབས་དེར་ལོ་རྒྱུས་རིག་པ་ལ་རྒྱུས་མངའ་དེ་ཙམ་མེད་སྟབས། སྔར་གྱི་དོ་སྣང་དེའི་སྟེང་ལ་དོ་སྣང་འཕར་མ་སྐྱེ་རྒྱུའི་ཚབ་ལ་སྔར་གྱི་དོ་སྣང་དེ་ཡང་མེད་པར་གྱུར། སྤྱི་ལོ་༡༩༩༦ ལོར་དགེ་འདུན་ཆོས་འཕེལ་གྱི་སྐོར་དྲང་བདེན་གྱིས་བསླུས་པའི་སློང་མོ་བ་ཞེས་པའི་དཔེ་དེབ་ཅིག་བྲིས་པ་ཡིན། བོད་ཀྱི་དུས་བབ་གསར་ཁང་གིས་དཔར་འདེབས་བྱེད་རྒྱུ་ཡིན་ཟེར་ནས་ལོ་ངོ་གཉིས་ལྷག་ལ་ཁོང་ཚོས་ཉར་བ་རེད་དེ་མཐའ་མཇུག་དཔར་སྐྲུན་བྱེད་ཐུབ་མེད། དེར་བརྟེན་༡༩༩༩ ལོེར་རང་སྒེར་གྱིས་དཔར་སྐྲུན་བྱས་པ་ཡིན། དཔེ་དེབ་དེ་དཔར་སྐྲུན་བྱས་པ་དེས་མི་ཚེའི་མདུན་ལམ་ལ་གྱོང་གུན་གསབ་ཏུ་མེད་པ་ཞིག་རག་ཡོད། དེ་ཡང་རྒྱུ་མཚན་གཙོ་བོ་གཅིག་རང་རེད། དཔེ་དེབ་དེར་སྐུ་ཞབས་ཞྭ་སྒབ་པའི་སྲིད་དོན་རྒྱལ་རབས་ཀྱི་རྩོམ་གཞི་(ཀིརྟི་རིན་པོ་ཆེས་དགེ་འདུན་ཆོས་འཕེལ་ལ་རྒྱུས་ཡོད་ཁག་ཅིག་ལ་བཅར་འདྲི་དང་ཕྱོགས་བསྒྲིགས་གནང་བའི་དེབ་དེའི་ནང་དུ། སྔར་དགེ་ཆོས་འཛིན་བཟུང་བྱས་སྐབས་བོད་ཀྱི་སྲིད་དོན་རྒྱལ་རབས་ཤིག་ཡོད་པའི་སྐོར་བཤད་འདུག)དེ་ཕལ་ཆེར་དགེ་ཆོས་ཀྱི་ཡིན་པའི་དོགས་སློང་བྱས་པ་དེས་བློ་ཡུལ་ལས་འདས་པའི་དོན་དག་མང་བོ་ཞིག་གི་མགོ་བསླངས་བྱུང་། (more…)

༸གོང་ས་མཆོག་ནི་མི་གཙོ་བོ་དང་མིའི་བདེ་དོན་གཙོ་བོར་འཛིན་མཁན་ཞིག་རེད།

Kunchok

བཅར་འདྲི་ཞུ་ཡུལ། ཨ་འབྲུག་དཀོན་མཆོག།
བཅར་འདྲི་ཞུ་མཁན། སྐར་ཁུང་དྲ་བ།

དྲི་བ།
གལ་སྲིད་མི་རིགས་ཀྱི་ངོ་བོ་སྲུང་སྐྱོབ་དང་ནང་ཆོས་སྲུང་སྐྱོབ་གཉིས་གདམ་ཀ་ཞིག་ཡིན་པའི་དབང་དུ་བྱས་ན། ༧རྒྱལ་བ་རིན་པོ་ཆེས་གཙོ་བོ་གང་འདེམས་ཀྱི་རེད་དམ།

དྲི་ལན།
ང་རང་གིས་༸གོང་ས་མཆོག་གི་བཀའ་སློབ་དང་དགོངས་དོན་ལ་སློབ་སྦྱོང་དང་ཞིབ་འཇུག་བྱེད་ཐབས་ཀྱི་ཁ་ཕྱོགས་སམ་རྩ་འཛིན་ཞིག་ནི། ༸གོང་ས་མཆོག་གིས་གང་ཞིག་གསུངས་པའི་ནང་དོན་ཕྱོགས་བསྡོམས་དང་། ཅིའི་ཕྱིར་གསུངས་པའི་དགོངས་དོན་འཚོལ་ཞིབ་བྱེད་པ་དེ་གཉིས་ཡིན། གཞི་རྩ་འདིའི་ཐོག་ནས་བཤད་ན་སྤྱིའི་ཆ་ནས་༸་གོང་ས་མཆོག་གིས་བོད་མི་རིགས་དང་ནང་བསྟན་ཆོས་ལུགས་གཉིས་ལ་གདམ་ཀའི་རང་བཞིན་གྱི་དབྱེ་ཁྱད་ཅིག་ཕྱེས་ཡོད་པ་ཁོ་བོས་མ་མཐོང་། སྤྱིར་ན་༸གོང་་མཆོག་གིས་ནང་བའི་ཆོས་ལུགས་ལུགས་འདི་བོད་པའི་ངོས་ནས་བཤད་ན་འདི་བོད་པའི་བསམ་སྤྱོད་ལ་ཤན་ཤུགས་ཆེས་ཆེ་བའི་ཆོས་ལུགས་ཙམ་མ་ཡིན་པར། བོད་པ་དུས་རབས་ཉེར་གཅིག་པའི་འཛམ་གླིེང་གི་ཤེས་ཡོན་འཕེལ་རིམ་གྱི་ཁོར་ཡུག་ཏུ་འགྲེངས་བྱེད་ཀྱི་ཤེས་ཡོན་གྱི་ཕུང་བོ་ཁྱད་པར་བ་ཞིག་ཏུ་གཟིགས་བཞིན་པ་དང་། (more…)

བཙན་བྱོལ་ནང་དུ་བོད་ཀྱི་སྐད་ཡིག་སྲུང་སྐྱོབ་ཐད་བོད་དང་བསྡུར་ཐབས་མེད་པ་ལྟ་བུར་མཐོང་།

Sangya Tendar

བཅར་འདྲི་ཞུ་ཡུལ། ན་ག་སངས་རྒྱས་བསྟན་དར།
བཅར་འདྲི་ཞུ་མཁན། སྐར་ཁུང་དྲ་བ།

གཅིག
དྲི་བ། བཙན་བྱོལ་ནང་བོད་ཀྱི་སྐད་ཡིག་ལ་འཕྲད་ཀྱིན་པའི་ཉེན་ཁ་ཆེ་ཤོས་དེ་གང་རེད་དགོངས་ཀྱིན་ཡོད་དམ།།

ལན། བཙན་བྱོལ་ནང་བོད་ཀྱི་སྐད་ཡིག་ལ་འཕྲད་ཀྱིན་པའི་ཉེན་ཁ་ཆེ་ཤོས་ནི། བོད་ཀྱི་སྐད་ཡིག་ལ་ངོས་འཛིན་ནོར་བ་དང་། དེ་ཡི་དགོས་མཁོ་ངོས་འཛིན་མ་ཐུབ་པ། བོད་ཡིག་གི་གནས་ཚད་གང་འཚམ་ཞིག་མ་སླེབས་བར་བོད་ཡིག་དེབ་མང་པོ་སྤྱོད་རྒྱུར་དཀའ་ངལ་འཕྲད་པ། འཚོ་བའི་ནང་དུ་དབྱིན་ཇིའི་གོ་སར་སླེབས་མ་ཐུབ་པ། ཐ་སྙད་ཡོངས་སུ་གྲགས་པ་དང་གཅིག་མཚུངས་ཆགས་དཀའ་བ། འཛིན་སྐྱོང་དང་མང་ཚོགས་གཉི་གས་བོད་ཀྱི་སྐད་ཡིག་ཐད་ཆགས་ན་ཞོ་དང་མ་ཆགས་ད་རའི་ཚུལ་དུ་ངོས་འཛིན་བྱས་དང་བྱེད་བཞིན་པ་སོགས་ཡིན། (more…)

ངས་ཁྱིམ་རྒྱུད་འདིའི་ལོ་རྒྱུས་ཡིག་ཐོག་ཏུ་ཕབ་ནས་ཅིས་ཀྱང་ཉར་དགོས་འདུག་བསམ་སོང་།

བཅར་འདྲི་ཞུ་ཡུལ། གཡང་འཛོམས་རྦི་རོན།
བཅར་འདྲི་ཞུ་མཁན། སྐར་ཁུང་དྲ་བ།

གཅིག
དྲི་བ། ཁྱེད་ཀྱི་སེམས་སུ་ “རི་ཚོགས་བརྒལ་བ་” ཟེར་བའི་དེབ་དེ་རྩོམ་བློ་ཇི་ལྟར་འཁྲུངས་བ་ཡིན་ནམ།

དྲིས་ལན། ངེད་ཚང་གི་ནང་མིའི་ཁྲོད་དུ། ང་ཚོས་དུས་རྒྱུན་དུ་ང་ཚོའི་རྨོ་རྨོ་དང་ཨ་མས་དེ་སྔ་བོད་ནང་དུ་ཇི་ལྟར་འཚོ་བ་སྐྱེལ་མིན་དང་རྒྱ་ནག་གིས་བོད་བཙན་བཟུང་བྱས་རྗེས་ཇི་ལྟར་བྲོས་བྱོལ་བྱས་མིན། ཨ་མ་ལགས་ངའི་པཱ་ལགས་དང་མ་འཕྲད་གོང་གི་རྒྱ་གར་ནང་གི་ཁོང་ཚོའི་བཙན་བྱོལ་གྱི་འཚོ་བ་བཅས་ཀྱི་སྐོར་ལབ་གླེང་བྱེད་དགོས་ཐུག་གིན་ཡོད་ལ། དེ་ནི་དུས་རྟག་ཏུ་ཡིད་དབང་འཕྲོག་པ་ཞིག་ཀྱང་ཡིན་པས། ངས་ཁྱིམ་རྒྱུད་འདིའི་ལོ་རྒྱུས་ཡིག་ཐོག་ཏུ་ཕབ་ནས་ཅིས་ཀྱང་ཉར་དགོས་འདུག་བསམ་སོང་། དེ་ལྟ་བུའི་ལོ་རྒྱུས་དེ་ངེད་ཚང་གི་སྐོར་གཅིག་པུ་ཙམ་མ་ཡིན་པར་བོད་མིའི་དུད་ཚང་གཞན་པ་མང་པོ་ཞིག་ལ་རྒྱ་ནག་གིས་བོད་བཙན་བཟུང་བྱེད་པའི་སྐབས་ལ་དེ་ལྟ་བུའི་མྱོང་བ་ཡོད་ཡོད་རེད། སྤྱི་ལོ་༢༠༠༨ལོའི་སྤྱི་ཟླ་༣པའི་བོད་ནང་གི་ཞི་བའི་ཡར་ལངས་ཀྱི་རྗེས་དང་པེ་ཅིན་དུ་རྒྱལ་སྤྱིའི་དབྱར་ཁའི་ཨོ་ལིམ་ཕིག་རྩེད་འགྲན་འགོ་མ་ཚུགས་གོང་དེ། ངས་མི་ཚང་གཅིག་གི་མི་རབས་གསུམ་གྱི་གཏམ་རྒྱུད་གཞི་ལ་བཞག་ནས་བོད་ཀྱི་སྐོར་ལ་དེབ་ཞིག་འབྲི་རྒྱུའི་དུས་ཚོད་ཡག་ཤོས་ལྟ་བུ་ཞིག་རེད་བསམ་སོང་ལ། འཇར་མན་གྱི་དཔེ་བསྐྲུན་ཁང་འགའ་ཡིས་ཀྱང་དེ་ལ་སྤྲོ་སྣང་ཆེན་པོ་བྱས་སོང་། དེར་བརྟེན། ངས་ང་ཚོའི་ཁྱིམ་ཚང་གི་ལོ་རྒྱུས་འབྲི་འགོ་བསླངས་བ་ཡིན། (more…)

རང་རྣམ་དང་གཞན་གྱིས་བརྩམས་པའི་རྣམ་ཐར་གཉིས་ལས་རང་རྣམ་ལ་སྐྱོན་ཧ་ཅང་ཉུང་།

བཅར་འདྲི་ཞུ་ཡུལ། ཧོར་གཙང་འཇིགས་མེད།
བཅར་འདྲི་ཞུ་མཁན། སྐར་ཁུང་དྲ་བ།

དང་པོ།
དྲི་བ། བོད་པས་བྲིས་བའི་བླ་མའི་རྣམ་ཐར་མང་པོའི་ཁོངས་སུ། བླ་མའི་མཚན་དང་འཁྲུངས་ཡུལ། བཤེས་གཉེན་སུ་བསྟེན་སོགས་ཀྱི་ཁྱད་པར་མ་གཏོགས་སྐུ་གསུང་ཐུགས་ཀྱི་ཡོན་ཏན་དང་མཛད་འཕྲིན་སོགས་གཅིག་མཚུངས་ལྟ་བུར་བྲིས་བ་མང་ཙམ་འདུག དེ་དག་རྣམ་ཐར་འབྲི་སྟངས་ཀྱི་སྐྱོན་ཞིག་ལ་མཐོང་གི་འདུག་གམ།

དྲིས་ལན།
དྲིས་ལན་དངོས་གཞི་མ་ཞུས་སྔོན་ལ་རྣམ་ཐར་ཞེས་པའི་གོ་དོན་ལ་བསམ་གཞིགས་བྱེད་རྒྱུ་གལ་ཆེན་དུ་མཐོང་། རྒྱུ་མཚན་ནི་ཁྱེད་ཀྱི་དྲི་བ་གཏོང་སྐབས་དེང་ནུབ་ཕྱོགས་ཀྱི་གང་ཟག་བྱེ་བྲག་པའི་ལོ་རྒྱུས་(Biography /Autobiography)ལྟ་བུ་སེམས་ལ་བཞག་སྟེ་བོད་ཀྱི་རྣམ་ཐར་རྩོམ་སྟངས་ལ་དྲི་བ་བཏང་བ་ལྟ་བུའི་སྣང་བ་སྟེར་བའི་སྟབས་ཀྱིས་ཡིན། ང་རང་གི་ལྟ་སྟངས་ལ་བོད་ཀྱི་བླ་སྤྲུལ་ཚོའི་རྣམ་ཐར་དང་། སྤྱིར་བཏང་གི་མི་དཀྱུས་མའི་ལོ་རྒྱུས་གཉིས་མི་འདྲ་སྟེ། རྣམ་ཐར་ཞེས་པའི་ཐ་སྙད་འདིས་འཇིག་རྟེན་གྱི་སྐྱེས་བོ་གང་ཞིག་གི་དོན་དུ་གཉེར་བྱ་ཆབ་སྲིད་དང་། དབང་ཐང་། སྟོབས་འབྱོར། མཚན་སྙན་སོགས་ལ་རྦད་དེ་རྒྱབ་གཏོད་ཀྱིས། དམ་པའི་ཆོས་ཚུལ་བཞིན་ཉམས་སུ་བླངས་པ་ལ་བརྟེན་ནས་ཐར་བའི་གོ་འཕང་དུ་གཤེགས་ཚུལ་སྟོན་པ་ཞིག་ཡིན་དགོས་པ་འདྲ། དེས་ན་རྣམ་པར་ཐར་བའམ་ཀུན་ཏུ་ཐར་བ། རྦད་དེ་ཐར་བ་ཞེས་པའི་གོ་དོན་ཡོད་པ་ཡིན། རྣམ་པར་ཐར་བ་ཞེས་པའི་ཐར་ས་དེ་ང་ཚོས་བརྩོན་བཞིན་པའི་འཁོར་བའི་ཕུན་ཚོགས་འདི་ཡིན་དགོས། དེའི་སྟབས་ཀྱིས་འཇིག་རྟེན་གྱི་སྐྱེ་བོ་སྤྱི་ཡོངས་ཀྱི་སྣང་ངོ་ལ་གཞིགས་ན་བོད་ཀྱི་བླ་སྤྲུལ་ཚོའི་རྣམ་ཐར་ལ་མ་འདང་སའི་ཆ་མང་མོད། རྣམ་ཐར་ཁོ་རང་གི་གོ་དོན་གཅིག་པུའི་སྟེང་ནས་བསམ་ཚེ་ཞན་ཆ་ཇེ་ཉུང་དུ་འགྲོ།
ཆོས་ཕྱོགས་མ་ཡིན་པའི་གང་ཟག་རང་དགའ་བའི་ལོ་རྒྱུས་ལ་ཐུན་མོང་གིས་ཁས་ལེན་པའི་མིང་གི་ཐ་སྙད་ཅིག་ད་ལྟ་བྱུང་མེད་པ་འདྲ་ཡང་། ཁོ་བོས་ཆུང་དུས་ཀློག་མྱོང་བའི་རྒྱ་ནག་གི་དམག་སྤྱི་ཆེན་མོ་ཕིན་ཏེ་ཧྭེ་ལོ་རྒྱུས་ལ། ཕིན་ཏེ་ཧྭེ་རང་བཤད་ལོ་རྒྱུས་བྲིས་ཡོད་པ་དྲན། (more…)

འཁྱོག་བརྗོད་བྱས་པ་ཙམ་གྱིས་རང་ཚུགས་ཤོར་འགྲོ་གི་ཡོད་པ་ཡིན་ན། དེ་ལོ་རྒྱུས་མ་རེད།

( འཁྱོག་བརྗོད་བྱས་པ་ཙམ་གྱིས་རང་ཚུགས་ཤོར་འགྲོ་གི་ཡོད་པ་ཡིན་ན། དེ་ལོ་རྒྱུས་མ་རེད། དེ་བདེན་པ་མ་རེད།)

བཅར་འདྲི་ཞུ་ཡུལ། རྡོ་རྗེ་དབང་ཕྱུག
བཅར་འདྲི་ཞུ་མཁན། སྐར་ཁུང་དྲ་བ།

དང་པོ།
དྲི་བ། དེང་གི་དུས་སུ་བོད་ཡིག་ཐོག་རྩོམ་འབྲི་བྱེད་མཁན་ཧ་ཅང་མང་རུང་བོད་རིགས་རྩོམ་པ་པོའི་ཁྲོད་དུ་བོད་རིག་པའི་ཞིབ་འཇུག་པ་ཉུང་གི དེའི་རྒྱུ་རྐྱེན་གཙོ་བོ་གང་ལ་ཐུག་ཡོད་དམ།

ལན། དེ་རིང་ཁ་སང་ལ་མཚོན་ན། བོད་ཕྱི་ནང་གང་ལ་བལྟས་པ་ཡིན་ནའང་། བོད་ཡིག་ཐོག་རྩོམ་ཡིག་འབྲི་མཁན་ཧ་ཅང་མང་པོ་རེད། དེའི་ནང་ནས་ཀྱང་སྙན་ངག་རྩོམ་འབྲི་བྱེད་མཁན་དེ་ལས་ཀྱང་མང་པོ་རེད། རྩོམ་ཡིག་གི་ཁྱབ་ཁོངས་འདྲ་པོ་བྱས་ནས་ཕར་བལྟས་པ་ཡིན་ན། ད་ལྟ་ཁྱེད་རང་གིས་བཤད་པ་ལྟར་རེད། ཞིབ་འཇུག་རྩོམ་ཡིག་འབྲི་མཁན་དེ་ཙམ་མང་པོ་མེད་པའི་གནས་སྟངས་ཤིག་ཆགས་བསྡད་ཡོད་པ་དེ་བདེན་པ་རེད། ད་ལྟ་ཁྱེད་རང་གིས་མང་ཉུང་གི་སྐོར་བཤད་པ་འདི། རྒྱལ་སྤྱིའི་བོད་རིག་པའི་ཁྱབ་ཁོངས་ཀྱི་གྲངས་འབོར་ལ་དཔག་པའི་བཤད་སྟངས་ཤིག་བཤད་ཀྱི་ཡོད་པ་རེད། བོད་རིགས་ཀྱི་ནང་ལ་བོད་རིག་པའི་ཞིབ་འཇུག་པ་ཉུང་དོན་གཅིག་དེ་ཞིབ་འཇུག་གི་ཆེད་ལས་གནང་བསྡད་མཁན་མང་པོ་མེད་པ་དེར་ཐུག་ཡོད་པ་རེད་དྲན་གི་ཡོད། གང་ལ་ཟེར་ན། ད་ལྟ་ང་ཚོར་བོད་རིག་པའི་ཞིབ་འཇུག་པ་ཟེར་བའི་དཔུང་ཁག་ཆེན་པོ་ཞིག་ཡོད་བསྡད་པ་འདིའི་ནང་། བོད་རིགས་ཡིན་པའི་བོད་རིག་པ་བ་ཟེར་བ་དེ་གྲངས་འབོར་གྱི་ཆ་ནས་ཉུང་ཉུང་རེད། ཉུང་ཉུང་དེའི་ནང་དུའང་ཞིབ་འཇུག་ཆེད་ལས་པ་ཉུང་ཉུང་རེད། མང་ཆེ་བ་དགེ་རྒན་གྱི་རིགས་ཆགས་ཡོད་པ་ཞིག་མཐོང་གི་ཡོད། ཡིན་ནའང་རྒྱལ་སྤྱིའི་བོད་རིག་པའི་ཞིབ་འཇུག་པའི་གྲངས་འབོར་དེ་ཐེངས་རེའི་ཚོགས་ཞུགས་མི་སྣའི་གྲངས་འབོར་དེས་ཁྱབ་ཀྱི་ཡོད་མེད་སྣ་ཚོགས་ཡོད་པ་རེད། བོད་ནང་ལྟ་བུར་མཚོན་ན། ཚོགས་ཐེངས་རེར་མི་གྲངས་བརྒྱ་སྐོར་རེ་ཚོགས་ཞུགས་གནང་གི་ཡོད་པ་རེད་དེ། ཐོངས་མཆན་རག་མིན་སོགས་ཀྱི་དབང་གིས་ཚོགས་ཞུགས་མ་ཐུབ་པའི་རིགས་ཀྱང་མང་པོ་ཞིག་ཡོད་པ་རེད། འདི་ལྟར་བལྟས་པ་ཡིན་ན། གྲངས་འབོར་ཐད་ནས་མཐའ་གཅིག་ཏུ་འདི་རེད་གན་རེད་ཅེས་ཤོད་ས་མི་འགྲོ་བ་ལྟ་བུ་ཞིག་རེད། (more…)

སྐྱ་བོའི་སྡེ་ཡིས་བྲིས་པའི་སྙན་ངག་དེ་ཚོ་ནི་ཆོ་མེད་བྲོ་མེད་དུ་གཏོང་ཐུབ་ཀི་རེད།


བཅར་འདྲི་ཞུ་ཡུལ། ཀླུ་སྨྱོན་ཡེ་ཤེས་རྒྱ་མཚོ།
བཅར་འདྲི་ཞུ་མཁན། སྐར་ཁུང་དྲ་བ།

༡) བོད་ཀྱི་རྩོམ་རིག་ལོ་རྒྱུས་ཁྲོད། གྲྭ་བ་རྩོམ་པ་པོའི་ནང་དུ་བུད་མེད་ཀྱི་སྐོར་ལ་སྙན་ངག་འབྲི་མཁན་མང་དུ་འགྲོ་བཞིན་པ་འདིའི་རྒྱུ་རྐྱེན་གཙོ་བོ་ཅི་ཞིག་རེད་འདོད་དམ།


ལན། དང་པོར་ང་ཚོས་བུད་མེད་ལ་ངོས་འཛིན་གསལ་བོ་ཞིག་བྱེད་དགོས། དེ་ནས་བུད་མེད་ལས་མ་སྐྱེས་པའི་རབ་བྱུང་བ་ཞིག་ཡོད་མེད་ཞིབ་འཇུག་བྱེད་དགོས། གལ་སྲིད་དེ་འདྲ་ཞིག་མེད་ན་ཅིའི་ཕྱིར་རབ་བྱུང་བས་བུད་མེད་དགྲ་རུ་འཛིན་དགོས་པའི་གནས་ལུགས་ཤིག་ཡོད་མེད་བརྟག་དགོས། ཏེ་ལོ་བས། སྣང་བས་མི་འཆིང་ཞེན་པས་འཆིང་།།ཞེན་པ་ཆོད་ཅིག་ན་རོ་བ།།གསུངས་པ་བཞིན། བུད་མེད་ལ་བསྟོད་པ་ཙམ་གྱིས་སྡོམ་པ་འཇིག་མི་འཇིག་དང་། བུད་མེད་ལ་བཏང་སྙོམས་སུ་བཞག་པ་ཙམ་གྱིས་འཁོར་བ་ལ་ཞེན་པ་ལྡོག་ཐུབ་མི་ཐུབ་ཤེས་དགོས། གང་ལྟར་རབ་བྱུང་བས་བུད་མེད་ལ་བསྟོད་མི་ཆོག་པ་ནི་མདོ་ལུགས་རྐྱང་བའི་འདུལ་ཁྲིམས་ཀྱི་འགྲོ་སྟངས་ཤིག་རེད། སྔགས་ལུགས་ལྟར་ན་བུད་མེད་ཀྱིས་ཤེས་རབ་མཚོན་གྱི་ཡོད་པས། ཤེས་རབ་ཀྱི་རང་བཞིན་ལ་བསྟོད་པ་འབྲི་བ་དེ་ལུགས་དང་མཐུན་པ་ཞིག་རེད། ཁ་གསལ་ཙམ་ཞུས་ན་དེ་ནི་ཚེ་གཅིག་སངས་རྒྱས་ཀྱི་ལམ་ལ་འཁྲིད་པར་བྱེད་པའི་བསྟན་པ་རླབས་པོ་ཆེ་ཞིག་སྙིགས་དུས་འདིར་གོང་ནས་གོང་དུ་འཕེལ་བའི་རྟགས་མཚན་ཁྱད་པར་བ་ཞིག་ལོས་ཡིན།
 (more…)

གློག་ཀླད་མཉེན་ཆས་ཅན་གྱི་ཚིག་མཛོད་ནི་ད་ལྟ་གསར་དུ་འགོ་འབུས་ཙམ་རེད།


བཅར་འདྲི་ཞུ་ཡུལ། བློ་བཟང་སྨོན་ལམ།
བཅར་འདྲི་ཞུ་མཁན། སྐར་ཁུང་དྲ་བ།

༡) སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་ཞིབ་འཇུག་གི་ཁྱབ་ཚད་ག་འདྲ་ཡིན་ནམ།

ལན། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་ནི་བརྡ་འཕྲིན་ཤེས་བྱ་དང་། བོད་སྐད་ཡིག་དང་འབྲེལ་པའི་མཉེན་ཆས་སྣ་ཚོགས་ལ་ཞིབ་འཇུག་དང་བཟོ་སྐྲུན་བྱེད་སའི་ལས་ཁུངས་ཤིག་ཡིན་ལ། རྡ་རམ་ས་ལར་རྟེན་གཞི་བྱས་ཡོད། ད་ལྟའི་སྐབས་སུ་འདི་ག་ཞིབ་འཇུག་ཁང་གི་ལས་ཀ་གཙོ་བོ་ནི་བོད་ཀྱི་སྐད་ཡིག་དེ་ཉིད་དེང་དུས་ཀྱི་བརྡ་འཕྲིན་བརྒྱུད་ལམ་ཁྲོད་སྔོན་ཐོན་སྐད་ཡིག་གཞན་དག་དང་འདྲ་བར་བེད་སྤྱོད་ཆ་ཚང་ཞིང་ཡང་དག་པ་ཞིག་ཡོང་ཐབས་ལ་འབད་རྒྱུ་དེ་ཡིན་ཞིང་། དམིགས་ཡུལ་དེའི་ཆེད་དུ་འདི་ནས་མིག་སྔའི་ཆར་ཞིབ་འཇུག་དང་ལས་ཀའི་རྣམ་གྲངས་འགའ་ཞིག་གཉེར་གྱི་ཡོད་པ་ནི། བོད་ཡིག་གི་གློག་ཀླད་ཚིག་མཛོད་ཆེན་མོ་ཞིག་རྩོམ་སྒྲིག་བྱེད་མུས་དང་། དེ་བཞིན་ཡི་གེའི་རང་འགུལ་གྱིས་ཞུ་དག་གཏོང་བྱེད་ཀྱི་མཉེན་ཆས། བརྡ་སྤྲོད་དང་ཚིག་གི་གོ་རིམ་རང་འགུལ་གྱིས་ཞུ་སྒྲིག་བྱེད་སྤྱད། བོད་ཡིག་རང་འགུལ་གྱིས་ཀློག་འདོན་བྱེད་སྤྱད་སོགས་ཡིན། (more…)

སྙན་ངག་པ་ཨ་འཇམ་དབྱངས་ཚུལ་ཁྲིམས་ལ་བཅར་འདྲི།

བཅར་འདྲི་ཞུ་མཁན། སྐར་ཁུང་དྲ་བ།
བཅར་འདྲི་ཞུ་ཡུལ། ཨ་འཇམ་དབྱངས་ཚུལ་ཁྲིམས།

སྐར་ཁུང་།
ཐོག་མར་ཁྱེད་རང་སྙན་ངག་འབྲི་བའི་ལམ་དུ་ཞུགས་པར་དམིགས་བསལ་གྱི་རྒྱུ་རྐྱེན་ཅི་ཡོད་དང་ད་བར་གྱི་གྲུབ་འབྲས་ལ་ངོས་འཛིན་ཇི་ལྟར་གནང་གི་ཡོད་དམ།

ཨ་འཇམ།
སློབ་ཆུང་གི་ཅོག་ཙེ་རྙིང་བའི་སྟེང་གི་ཀ་ཕྲེང་གི་ལས་བྱའམ་ནང་ལས་འཁྱར་འཁྱོར་བཀོད་པ་དེ་ནི་ཐོག་མའི་དབྱངས་གསལ་མཛེས་ཉམས་སུ་མངོན་པའི་ས་བོན་རེད། སྐབས་དེའི་སྙན་ངག་ལ་དགེ་རྒན་གྱི་བསྔགས་བརྗོད་སྐམ་པོ་ཞིག་གིས་བརྒྱན་པས་དེ་བས་ཀྱང་བྱིས་པའི་འཕྲུལ་སྣང་གི་གཤོག་པ་དེས་ཚད་མེད་པའི་གཤོག་པ་ཐོགས་པར་བྱས། དེ་ནས་བྱིས་པའི་དགའ་སྣང་དེ་རྫི་གླུ་དང་གཏམ་དཔེར་འདྲེས་ཤིང་། སྟོན་བཤད་དང་ས་བསྟོད་སོགས་འདྲེས་ནས་ཡུན་གྱིས་དུས་དེབ་རྙིང་བའི་ཟུར་གའི་ཚིག་ རྒྱན་ཁ་ཤས་ཀློག་པའི་འཇུ་སྟོབས་རན་ཙམ་བྱུང་། ག་ལེར་མི་སུས་ཀྱང་ཚོར་ཐབས་མེད་པའི་ཁྲོད་དུ་སྙན་ངག་གི་རྐང་ཁ་ཡོར་བོ་ཡང་ཅུང་ ཟད་ཚུགས་པར་གྱུར་བའི་ཉམས་སྣང་ཞིག་མཆིས་ཀྱང་། དེ་ནི་བྱིས་པའི་ལོ་ཟླ་དང་རྦད་དེ་འདྲེས་པས་སྙན་ངག་ཅིག་ལྕི་ཚད་ཀྱི་ཆ་ནས་ཧ་ཅང་ རྒྱང་ཐག་རིང་བའི་གྲ་སྒྲིག་གི་གོ་རིམ་ཙམ་ལས་ཅི་ཡང་མིན། (more…)

རྩོམ་པ་པོ་ནི་སྤྱི་ཚོགས་ལ་སྣེ་འཁྲིད་མཁན་ཡིན་ནམ།

བཅར་འདྲི་ཞུ་ཡུལ། ཆབ་བྲག་ལྷ་མོ་སྐྱབས།
བཅར་འདྲི་ཞུ་མཁན། སྐར་ཁུང་དྲ་བ།

༡) དེ་རིང་སང་ཉིན། བོད་ཡིག་གི་རྩོམ་འབྲི་མཁན་ཚོའི་ཁྲོད་དུ། རྩོམ་པ་པོ་ནི་སྤྱི་ཚོགས་ཀྱི་སྣེ་འཁྲིད་མཁན་ཡིན་ཟེར་བ་དང་སྤྱི་ཚོགས་ལ་གཤག་བཅོས་གཏོང་མཁན་ཡིན་ཟེར་མཁན་འདུག སྐད་ཆ་འདི་དག་ཁ་གཡང་ལྟ་བུ་ཞིག་རེད་དམ་ཡང་ན་དོན་དངོས་སུ་འདི་དག་རྩོམ་པ་པོས་བྱེད་ཐུབ་པ་ཞིག་རེད།

ལན། ལོ་རྒྱུས་ལ་ཕྱི་མིག་ཅིག་བལྟས་ན་ཤེས་ཡོན་ཅན་ནམ་རྩོམ་པ་པོས་མིའི་རིགས་ལ་ལེགས་སྐྱེས་གྱ་ནོམ་པ་ཞིག་ཕུལ་འདུག་པ་ཚང་མས་མཐོང་གསལ་རེད། ཁྱིམ་མཚེས་རྒྱལ་ཁབ་རྒྱ་གར་ནག་གཉིས་ལ་མཚོན་ན་ཡང་མཁས་དབང་ཉི་དབང་མགོན་པོ་དང་སྐུ་ཞབས་ལུའུ་ཞུན་ལྟ་བུས་སྤྱི་ཚོགས་ཀྱི་ཁ་ལོ་བ་ལྟ་བུའི་ནུས་པ་ཐོན་ཡོད་པར་བཤད། བོད་རང་ལ་མཚོན་ན་ཡང་མཁས་དབང་དགེ་འདུན་ཆོས་འཕེལ་དང་སྐུ་ཞབས་དོན་གྲུབ་རྒྱལ་རྣམ་པ་གཉིས་ཀྱིས་དམིགས་བསལ་གྱི་ཕན་ནུས་ཐོན་ཡོད། བྱེ་བྲག་ཏུ་བཤད་ན་རྩོམ་པ་པོ་སོ་སོའི་ཤེས་ཚད་དང་བསམ་བློ་མི་འདྲ་བ་དང་བརྩམས་ཆོས་ཀྱང་མི་འདྲ་བ་ལ་བསྟེན་ནས་དེས་ཕན་ནུས་ཐོན་ས་ཡང་མི་འདྲ་བ་ཡོད་པ་རེད།

བཙན་བྱོལ་བོད་མིའི་སྤྱི་ཚོགས་ཁྲོད་ནས་དམིགས་བསལ་འབུར་ཐོན་གྱི་རྩོམ་པ་པོ་དེ་འདྲ་མེད་ན་ཡང་བསམ་བློ་གསར་བ་དང་མིག་རྒྱང་ཅུང་རིང་བའི་ཤེས་ཡོན་ཅན་མི་ཉུང་བ་ཞིག་ཐོན་གྱིན་ཡོད་ལ་བརྩམས་ཆོས་ཀྱང་ལེགས་པོ་མི་ཉུང་བ་རེ་ཐོན་གྱིན་ཡོད། འོན་ཀྱང་རྩོམ་ཡིག་གིས་ཕན་ནུས་ཐོན་མིན་དེ་ཀློག་པ་པོའི་གྲངས་ཚད་དང་ཤེས་ཚད་ལ་ཡང་རག་ལས་ཡོད། ངའི་བསམ་ཚུལ་ལ་༸རྒྱལ་བ་ཡིད་བཞིན་ནོར་བུ་དང་མཁས་དབང་ཟམ་གདོང་རིན་པོ་ཆེ་རྣམ་གཉིས་ཀྱི་གསུང་བཤད་གང་མང་ཞིག་ནི་རྩོམ་ཡིག་ལས་ལྷག་པའི་རིན་ཐང་ཅན་དང་ཁྱབ་ཚད་མཐོ་བ་ཡིན། དེ་བས་སྤྱི་ཚོགས་ལ་སྣེ་ཁྲིད་ཀྱི་ཕན་ནུས་ཀྱང་ཆེན་པོ་ཐོན་ཡོད། དེས་ན་དེ་ནི་ཁ་གཡང་སྟོང་༷པ་རང་མིན་པར་འདོད། (more…)

མཁས་དབང་ཟམ་གདོང་རིན་པོ་ཆེ་མཆོག་ལ་བཅར་འདྲི།


བཅར་འདྲི་ཞུ་ཡུལ། མཁས་དབང་ཟམ་གདོང་རིན་པོ་ཆེ།
བཅར་འདྲི་ཞུ་མཁན། སྐར་ཁུང་དྲ་བ།

སྐར་ཁུང་།
ད་ལྟའི་བོད་ཀྱི་གཞོན་སྐྱེས་ཡིག་སྒྱུར་པ་ཚོས་ཕྱིའི་སྐད་ཡིག་ནས་ཚུར་བོད་ཡིག་ལ་ངེས་པར་དུ་བསྒྱུར་དགོས་པའི་གསུང་རྩོམ་གང་དག་རེད།

ཟམ་གདོང་རིན་པོ་ཆེ།
ལན་ལམ་སང་ཕུལ་ཆོག་ཆོག་ཅིག་མི་འདུག ཕྱིའི་སྐད་ཡིག་ནས་ཚུར་བོད་ཡིག་ནང་དུ་བསྒྱུར་དགོས་པའི་གཞུང་མང་པོ་ཞེ་དྲག་ཡོད་རྒྱུ་རེད། ཡིན་ན་ཡང་། གཞུང་ཆེན་པོ་བསྒྱུར་བ་དང་རྩོམ་ཆུང་ཆུང་བསྒྱུར་བ་གཉིས་གནས་སྟངས་ཅུང་ཟད་ཁ་ཁ་རེད། ད་ལྟ་དྲ་རྒྱའི་ནང་དུ་འགྲོ་ཡའི་རྩོམ་ཐུང་ཐུང་དེ་འདྲ་དང་ཆེད་རྩོམ་གྱི་བཟོ་དེ་འདྲ་མང་ཆེ་བ་རེད། དེའི་སྐོར་ལ་ང་རྒྱུས་དེ་ཙམ་མེད་ལ། ད་ལྟ་འདི་འདྲ་བསྒྱུར་དགོས་པ་རེད་ཅེས་ལབ་ཐུབ་ཀྱི་མི་འདུག ཡིན་ན་ཡང་། དེ་རིང་སང་ཉིན་སྐད་ཡིག་གཞན་པ་ནས་བོད་སྐད་དུ་ཚུར་བསྒྱུར་ཡོང་བའི་སྐབས་ལ། སྒྱུར་པ་པོ་མང་པོ་ཞིག་གིས་བོད་ཀྱི་མིང་ཚིག་དང་ཐ་སྙད་མི་འདྲ་བ་མི་འདྲ་བ་མང་པོ་ཞིག་བེད་སྤྱོད་བཏང་ནས། ད་ལྟ་གཅིག་གྱུར་འབྱུང་རྒྱུ་ཁག་པོ་རེད་བསྡད་འདུག གཅིག་བྱས་ན་ཉི་མ་གཅིག་ལ་གཅིག་གྱུར་བཟོ་ཐུབ་པ་ཡོད་མ་རེད། ཡིན་ན་ཡང་། འབད་བརྩོན་བྱེད་རྒྱུ་དེ་སྒྱུར་པ་པོ་ཀུན་གྱིས་ཕར་ཚུར་དེ་རིང་སང་ཉིན་དྲ་རྒྱ་བེད་སྤྱོད་སྟབས་བདེ་བོ་ཡོད་ཙང་། འབྲེལ་བ་གང་ཐུབ་ཐུབ་ཡག་པོ་བཟོ་རྒྱུ་དང་། ཐ་སྙད་དང་བརྡ་ཆད་དེ་དག་གཅིག་གྱུར་ཞིག་བེད་སྤྱོད་གཏོང་ཐུབ་པ་ཡིན་ན་དེ་མ་འོངས་པ་ལོ་བརྒྱ་ཕྲག་ཁ་ཤས་ཕྱིན་པའི་རྗེས་ལ་ཕྱིར་བལྟས་སློག་པ་ཡིན་ན་ད་ལྟའི་གནས་སྐབས་ཀྱི་བོད་ཀྱི་སྐད་དང་ཡི་གེ བརྡ་སྤྲོད་བཅས་ལ་སྲུང་སྐྱོབ་ག་རེ་བྱེད་ཐུབ་པ་དང་ཉམས་ཆག་ག་རེ་ཕྱིན་པ་དེ་གནས་ཚུལ་དེ་ཚོའི་ཐོག་ནས་མཚོན་འགྲོ་གི་རེད་བསམ་གྱི་འདུག (more…)

ཆུང་ཚེ་རིང་ལ་ཡིག་བསྒྱུར་སྐོར་དྲིས་པ།


བཅར་འདྲི་ཞུ་ཡུལ་ཆུང་ཚེ་རིང་།
བཅར་འདྲི་ཞུ་མཁན་སྐར་ཁུང་དྲ་བ།

སྐར་ཁུང་། ད་ཕན་ཁྱོད་ནས་བོད་ཡིག་ཏུ་གྲགས་ཅན་དེབ་གཉིས་བསྒྱུར་འདུག་པ་མ་ཟད་དེ་ལ་ཀློག་མཁན་ཚོས་དགའ་བསུ་ཡང་མི་ཉུང་བ་ཐོབ་འདུག འོན་ཀྱང་། ཁྱེད་ཀྱིས་ཡིག་སྒྱུར་དེ་ལས་ཞོར་ནས་བྱེད་ཀྱི་འདུག་མ་གཏོགས་དེ་ཆེད་ལས་ཀྱི་ངོ་བོའི་སྒང་ནས་བྱེད་གི་མི་འདུག དེའི་རྒྱུ་མཚན་ཅི་ཡིན་ནམ།

ཆུང་ཚེ་རིང་། སྤྱིར་བཏང་དེང་རབས་ཀྱི་ཆེད་ལས་པ་ཟེར་དུས། ཆ་རྐྱེན་གསུམ་ཚང་དགོས་རེད། དང་པོ་དེ། ལས་རིགས་སམ་ལག་རྩལ་བྱེ་བྲག་པ་ཞིག་གི་ཐད་ལ་རང་མགོ་ཐོན་ངེས་ཀྱི་དམིགས་བསལ་ སྦྱོང་བརྡར་ཡོད་པ་དང་། གཉིས་པ་སྦྱོང་བརྡར་དེ་གཞི་བཟུང་ལས་རིགས་སམ་ལག་རྩལ་བྱེ་བྲག་པ་དེ་རང་གི་སྒང་ལ་ལས་ཀ་བྱེད་པ། གསུམ་པ། ལས་ཀ་དེའི་ཐོག་ནས་ཕར་སྤྱི་ཚོགས་ལ་ཞབས་ཞུ་དང་ཚུར་སོ་སོའི་འཚོ་གོས་འགྲིག་འགྲོ་བ་དེ་འདྲ་ཞིག་ཡིན་དགོས་པ་རེད། སྤྱིར་བཏང་བོད་སྐད་ནང་རིགས་གཅིག་རྐང་འཛིན་དང་། ཆེད་ལས་པ། ཁྱད་ལས་པ་བཅས་ཀྱི་གོ་དོན་དེ་ཚོ་ཕན་ཚུན་འཁྲུག་འགྲོ་གི་འདུག ང་ལ་ཡིག་སྒྱུར་གྱི་སྦྱོང་བརྡར་ཐོབ་མ་མྱོང་ལ། སོ་སོའི་འཚོ་བ་དེ་ཡང་ཡིག་སྒྱུར་ལ་བརྟེན་ནས་སྐྱེལ་གྱི་མེད། བསྐྱལ་བསམས་པའི་དབང་དུ་བཏང་རུང་། བོད་པའི་སྤྱི་ཚོགས་ནང་། དབྱིན་སྐད་ནང་ཕར་བསྒྱུར་ན་བསྒྱུར་གླ་ཆེན་པོ་སྤྲོད་པ་དང་། སོ་སོའི་སྐད་ཡིག་ནང་ཚུར་བསྒྱུར་ན། བསྒྱུར་གླ་སྤྲོད་མཁན་ཡོད་མ་རེད། བསྒྱུར་གླ་སྤྲད་པ་ཡིན་ནའང་། དབྱིན་ཇི་སོགས་ཀྱི་ནང་ཕར་བསྒྱུར་བ་ནང་བཞིན་གྱི་མཐོ་པོ་སྤྲོད་མཁན་དཀོན་པོ་རེད། དེ་ཡིན་དུས། དུས་ཚོད་ཆ་ཚང་ཡིག་སྒྱུར་གྱི་སྒང་ལ་བཏང་ནས་འགྲོ་ས་དཀོན་པོ་རེད། (more…)

གཟུངས་ཕྱུག་སྐྱིད་ལ་སྙན་ངག་སྐོར་དྲིས་པ།


བཅར་འདྲི་ཞུ་ཡུལ་གཟུངས་ཕྱུག་སྐྱིད་།
བཅར་འདྲི་ཞུ་མཁན་སྐར་ཁུང་དྲ་བ།

དང་པོ། ཁྱེད་རང་རང་བཙན་བྱོལ་ལ་སླེབས་པ་དེས། ཁྱེད་ཀྱི་སྙན་ངག་གི་སེམས་ཁམས་ལ་ཤུགས་རྐྱེན་གང་འདྲ་ཐེབས་ཡོད་དམ།

ལན། ང་རང་བཙན་བྱོལ་ལ་བསླེབས་པ་དེ་ནི་འཚོ་བ་དངོས་ལ་གདོང་ཐུག་བྱུང་བའི་བརྒྱུད་རིམ་ཞིག་ཡིན། སྙན་ངག་ནི་མ་གཞི་ནས་མིའི་འཚོ་སྡོད་ཀྱི་འཚོ་བ་དངོས་ལས་བྱུང་བའི་ནང་སེམས་ཀྱི་ཚོར་བ་དང་འབྲེལ་བ་ཡོད་པས། ང་རང་བཙན་བྱོལ་ཏུ་བསླེབས་རྗེས་ཀྱི་འཚོ་བ་ནི་འཐུས་ཚང་རང་བཞིན་གྱི་བརྒྱུད་རིམ་ཞིག་ཡིན་པར་འདོད། རྒྱུ་མཚན་ཕ་ཡུལ་གྱི་རི་ཆུ་ནགས་གསུམ་དང་བྱམས་བརྩེ་ལྡན་པའི་ཡུལ་མི་དག་གི་འཛུམ་མདངས་དྲོད་མོ་ལས་རིང་དུ་གྱེས་ཏེ། རྒྱུས་མེད་ཡུལ་གྱར་དུ་གནས་པའི་འཚོ་བ་ནི་ཁ་དོག་སྣ་ཚོགས་དང་སྐྱོ་སྡུག་འདྲེས་མས་བྲིས་པའི་མི་ཚེའི་ཟློས་སྒྲུང་ལྟ་བུ་ཞིག་ཡིན། ཟློས་སྒྲུང་འདིའི་ནང་དུ་ངའི་མི་ཚེའི་དྲན་སྣང་དང་སྐྱོ་སྣང་། ཡང་ན་ན་ཟུག་དང་འཁང་སེམས་སོགས་དམར་རྗེན་རྗེན་དུ་འགྲེམས་སྟོན་བྱས་ཡོད། འགྲེམས་སྟོན་དེ་ནི་ངས་རང་ཉིད་ཀྱི་སྙན་ངག་གི་སེམས་ཁམས་ངོ་མ་རྙེད་པའི་རིན་ཐང་དང་། ཡང་ན་རང་ཉིད་སྙན་ངག་ལ་དགའ་བའི་ཕུགས་འདུན་དང་ཐག་ཉེ་རུ་སོང་བའི་ཉམས་མྱོང་ཞིག་ལ་ངོས་འཛིན་བྱེད་ཀྱིན་ཡོད། དངོས་ཡོད་འཚོ་བའི་ཁ་དོག་དངོས་ཀྱི་ནང་ནས་དགའ་དུས་དགོད་མྱོང་ལ། སྡུག་དུས་ངུ་མྱོང་བའི་ངའི་སེམས་ཁམས་ན་སྙན་ངག་གི་བསྡུས་གཟུགས་རེ་རེ་རི་མོ་བཞིན་བྲིས་ཡོད་མོད། ཡིན་ནའང་དེ་དག་རེ་རེ་བཞིན་ཚད་མཐོ་བའི་སྒྱུ་རྩལ་གྱི་ལམ་ལས་བཞེངས་བསྐྲུན་དང་ལས་སྣོན་གྱི་ལས་འགན་ད་དུང་འགྲུབ་མེད་པའི་གནོང་འགྱོད་ཅིག་ང་ལ་དུས་རྒྱུན་འཁོར་གྱིན་འདུག (more…)

བོད་ཀྱི་དེང་རབས་སྒྱུ་རྩལ་བ་གྲགས་ཅན་བསྟན་འཛིན་རིག་གྲོལ་དང་ལྷན་དུ་།

བཅར་འདྲི་ཞུ་ཡུལ་བསྟན་འཛིན་རིག་གྲོལ།
བཅར་འདྲི་ཞུ་མཁན་སྐར་ཁུང་དྲ་བ།

༡) བོད་ཀྱི་དེང་རབས་སྒྱུ་རྩལ་ཟེར་ན་ཅི་ཞིག་རེད་།

དེང་རབས་མ་བརྗོད་སྔོན་ལ། དེང་རབས་ཟེར་བའི་ཐ་སྙད་འདི་ལ་ངེས་པར་དུ་བསམ་བློ་གཏོང་དགོས་ཀྱི་འདུག བོད་ཀྱི་དེང་རབས་སྒྱུ་རྩལ་ཟེར་དུས། ངས་བལྟས་ན་ཕལ་ཆེར་དགེ་འདུན་ཆོས་འཕེལ་གྱི་སྒང་ལ་ཐུག་གི་ཡོད་རེད་།
སྤྱིར་བཏང་ནས་དེང་རབས་ཟེར་དུས། ནུབ་ཕྱོགས་ལ་མཚོན་ན་དེང་རབས་ཟེར་ན་ཅི་ཞིག་རེད་ཟེར་བའི་སྐོར་ལ་ལྟ་ཚུལ་མང་པོ་ཡོད་རེད་། དེ་ཡང་མཚན་ཉིད་ཀྱི་སྒང་ལ་སྐོར་ན། དེ་དྲི་བ་གཏོང་མཁན་ཞིག་ལ་ཐུག་གི་ཡོད་པ་རེད་། དཔེར་ན། དེང་དུས་ཤེར་རྟོགས་རིག་པ་འགོ་འཛུགས་མཁན་སུ་རེད་ཟེར་དུས། (Rene Descarts) རེ་ནེལ་ སྒྲེ་ཁར་ཁྲི་ལ་ཐུག་གི་ཡོད་པ་རེད་། ཁོང་གི་ལྟ་གྲུབ་གཙོ་བོ་དེ་། བྱ་དངོས་ཅི་ཞིག་ཡིན་རུང་དེ་ལ་དོགས་འདྲི་བྱེད་དགོས་ཟེར་བ་དེ་རེད་། བྱ་དངོས་ཤིག་ལ་དོགས་འདྲི་བྱེད་མ་ཐུབ་པའི་ཚད་ལ་སླེབས་ན་ད་གཟོད་དེ་བདེན་པ་རེད་ཟེར་གི་ཡོད་རེད་། དོགས་འདྲི་ཟེར་དུས། བྱ་དངོས་ག་རེ་ཡིན་ན་ཡང་དེ་ལ་གློ་བུར་དུ་ཡིད་ཆེས་མི་བྱེད་པར་དྲི་བ་ཐོངས་ཟེར་བ་དེ་རེད་། དོགས་འདྲི་བྱེད་པ་ནི་དེང་རབས་མཚན་ཉིད་ཀྱི་སྤྱོད་པ་དེ་རེད་། ད་འདི་དགེ་འདུན་ཆོས་འཕེལ་གྱི་སྒང་ལ་སྦྱར་ན། དགེ་འདུན་ཆོས་འཕེལ་གྱི་ལྟ་སྤྱོད་ཀྱིས་ཀྱང་དེང་རབས་མཚོན་པ་མ་ཟད་། ཁོང་གིས་སོ་སོའི་རི་མོ་ལ་མཚན་རྟགས་བསྐྱོན་པ་སོགས་དེ་ངས་མཐོང་སོང་། དེ་ངའི་ཡིན། དེ་ངའི་ལྟ་ཕྱོགས་ཡིན་ཟེར་བ་ལྟ་བུ་ང་མང་པོ་ཞིག་གཅིག་རྗེས་གཉིས་མཐུད་དུ་ཡོང་གི་ཡོད་པ་རེད་། དོན་དངོས་སུ། ནུབ་ཕྱོགས་སུ་ང་ཟེར་བ་དེ་བསམ་བློ་ཐ་ཤལ་བ་ལ་བརྩི་གི་ཡོད་མ་རེད་། དགེ་འདུན་ཆོས་འཕེལ་ཁོ་རང་ཐང་ཀའི་སྒྱུ་རྩལ་ནས་ཕྱི་ལ་བཏོན་པ་ཙམ་མ་ཡིན་པར་སྲོལ་རྒྱུན་གྱི་གཤིས་ཀ་ནས་ཀྱང་ཕྱི་ལ་ཐོན་པ་རེད་། (more…)