དྲ་ཐོག་ནས་མི་ཚེ་སྐྱེལ་ན། ལམ་ཁ་བཅུ་འདི་སེམས་ལ་ཉེ་བར་ཞོག


འཇིགས་མེད་ནུབ་པ།

ཉེ་ཆར། ངས་གཞུང་གི་ལས་ཀ་བྱེད་མཁན་དང་ཚོགས་པ་སྒེར་བ་ལ་ལས་ཀ་བྱེད་མཁན། གསར་འགོད་པའི་ལས་རིགས་གཉེར་མཁན་ཁག་ཅིག་ལ་ཉིན་རེར་དྲ་ཐོག་ཏུ་དུས་ཚོད་ཇི་ཙམ་གཏོང་གི་ཡོད་མེད་སྐོར་ལ་དྲི་བ་བཏང་བ་ཡིན། ང་ལ་རག་པའི་ལན་ནི། ཆ་སྙོམས་བྱས་ན་མི་རེས་ཉིན་རེར་དྲ་ཐོག་ཏུ་དུས་ཚོད་བཅུ་གཉིས་ལྷག་གཏོང་གི་ཡོད་པ་དེ་རེད། འདིས་ཅི་ཞིག་སྟོན་ནམ་ཞེ་ན། བོད་རིགས་ཚོའི་ཁྲོད་དུ་ཡང་དྲ་ཐོག་ཏུ་མི་ཚེ་སྐྱེལ་མཁན་ཇེ་མང་ནས་ཇེ་མང་ལ་འགྲོ་བཞིན་ཡོད་པ་དེ་རེད། ཉིན་རེའི་དུས་ཚོད་མང་པོ་ཞིག་དྲ་ཐོག་ཏུ་གཏོང་བ་འདིས་མི་ཚེའི་ལས་དོན་མང་པོ་ཞིག་དྲ་ཐོག་ཏུ་སྒྲུབ་བཞིན་པ་སྟོན། ཇི་ཙམ་དྲ་ཐོག་ཏུ་ལས་ཀ་མང་བ་བྱས་ན། དེ་ཙམ་དྲ་ཐོག་ནི་མི་ཚེའི་གྲུབ་ཆ་ཞིག་ཆགས་བཞིན་པ་དེ་རེད། འོ་ན། དྲ་ཐོག་ནས་མི་ཚེའི་ལས་དོན་མང་པོ་ཞིག་བསྒྲུབ་པ་ལ། དྲ་ཐོག་ནས་བདེ་འཇགས་དང་ཉེན་སྲུང་གལ་མི་ཆེའམ། ངེད་ཀྱི་བསམ་པར། དྲ་ཐོག་ནས་མི་ཚེ་སྐྱེལ་གི་ཡིན་ན། གཤམ་གྱི་ལས་ཁ་བཅུ་འདི་སེམས་ལ་ཉེ་བར་འཇོག་རྒྱུ་གལ་ཆེ་བར་འདོད།

༡) ནང་དང་ལས་ཀ་གཉིས་ཀར། ཁྱེད་ཀྱི་བེ་ཧྥེ་དྲ་ལམ་དེ་ཉེན་སྲུང་ཡོད་པ་བྱོས།

སྐུད་མེད་དྲ་ལམ་གྱི་ཆེད་དུ་ཉེན་སྲུང་གི་ལྡེ་མིག་བརྟན་པོ་བཟོ་རྒྱུ་མ་བརྗེད། གང་ཡིན་ཞེ་ན། དེ་ནི་སྐུད་ཡོད་དྲ་ལམ་དང་མི་འདྲ་པར། བ་ཧྥེ་(Wifi)ཡིས་རླུང་འཕྲིན་གྱི་འོད་རླབས་བེད་སྤྱོད་གཏོང་གི་ཡོད་རྐྱེན། དེ་ཡི་བརྡ་རྟགས་དེ་ཁྱེད་ཀྱི་ཁྱིམ་དང་ལས་ཁུངས་གི་རྒྱ་ཁྱོན་ནས་བརྒལ་ཏེ་འགྲོ་ཐུབ། གལ་སྲིད་ཁྱེད་ཀྱི་སྐུད་ལམ་གྱི་དྲ་ལམ་དེ་བདེ་འཇགས་མིན་ཚེ། གཞན་གྱིས་ཁྱེད་ཀྱི་བ་ཧྥེ་ཡི་བརྡ་རྟགས་ཡོད་ས་གང་རུང་ནས་ཁྱེད་ཀྱིས་དྲ་ཐོག་ཏུ་ཅི་ཞིག་ལས་བཞིན་པར་ལྐོག་ལྟ་བྱེད་ཐུབ་པ་མ་ཟད་ད་དུང་ཁྱེད་ཀྱི་གློག་ཀླད་ནས་གནས་ཚུལ་ཡང་བརྐུ་ཐུབ། ཉེན་སྲུང་མེད་པའི་སྐུད་མེད་དྲ་ལམ་སྒོ་འབྱེད་པ་ནི། ཁྱེད་ཀྱིས་རང་གི་ཁང་པའི་སྒེ་ཕྱེས་ནས་གཞན་ལ་ནང་གི་ཅ་ལག་བརྐུ་བཅུག་པ་གཅིག་མཚུངས་ཡིན། དེར་བརྟེན། སྐུད་མེད་དྲ་ལམ་ལ་གསང་ཚིག་བརྟན་པོ་བཟོ་རྒྱུ་ཧ་ཅང་གལ་ཆེ།

༢) གློག་ཀླད་ཀྱི་མ་ལག་གཙང་ཉར་དང་གློག་ཀླད་དུས་ནས་དུས་སུ་གཙང་བཟོ་བྱོས།

གལ་སྲིད་ཁྱེད་ཀྱི་གློག་ཀླད་ལ་དྲ་འབུའི་གཏོར་རྒོལ་ཐེབས་ཡོད་ཚེ། དྲ་ཐོག་གི་ཉེན་སྲུང་གི་ཆེད་དུ་ཁྱེད་ཀྱིས་གྲ་སྒྲིག་དང་གཟབ་ནན་བྱས་བ་ཚང་མ་འཕྲོ་བརླག་ལྟ་བུ་རེད། དེར་བརྟེན། བདུན་གཅིག་གི་ནང་ལ་ཉུང་མཐར་ཡང་ཐེངས་རེར་སོ་སོའི་གློག་ཀླད་གཙང་བཟོ་བྱེད་རྒྱུ་གལ་ཆེ། ཁྱོད་ཀྱིས་བེད་སྤྱོད་གཏོང་བཞིན་པའི་དྲ་འབུ་གཙང་བཟོའི་མཉེན་ཆས་རིགས་ལ་ཡང་དྲ་འབུས་གཏོར་སྐྱོན་ཐེབས་སྲིད། གང་ཡིན་ཞེ་ན། ང་ཚོར་རག་པའི་དྲ་འབུ་མང་པོ་ཞིག་ནི་ཆེད་དུ་ང་ཚོ་གཏོར་བཅོམ་གཏོང་བར་དམིགས་ནས་བཟོས་བ་ཤ་སྟག་རེད། དེར་བརྟེན། དྲ་འབུ་ཚང་མར་དྲ་འབུ་གཙང་བཟོའི་མཉེན་ཆས་ཡོད་ན་ཡང་གཙང་བཟོ་བྱེད་ཁག་པོ་རེད། གལ་སྲིད། ཁྱེད་ནས་སོ་སོའི་གློག་ཀླད་ལ་ནམ་རྒྱུན་དང་མི་འདྲ་བའི་རྟགས་མཚན་མངོན་པའམ་ཡང་ན་དྲ་འབུ་སླེབས་ཡོད་པ་ཤེས་ཚེ། དེ་གཙང་བཟོ་བྱེད་པའི་ཐབས་ལམ་ཡག་ཤོས་དང་མགྱོགས་ཤོས་ནི། གློག་ཀླད་ཀྱི་བཀོལ་སྤྱོད་མ་ལག་(Operating system) བསྐྱར་འཇུག་བྱེད་རྒྱུ་དེ་ཡིན།

༣) གསང་ཚིག་བརྟན་པོ་བཟོས།

ང་ཚོ་མང་པོ་ཞིག་གིས་སོ་སོའི་དྲ་ཐོག་གི་གློག་འཕྲིན་ཁ་བྱང་སོགས་ཀྱི་སླད་དུ། གསང་ཚིག་མགོ་རྙོག་པོ་དང་བརྟན་པོ་བཟོ་བར་ལེ་ལོ་བྱེད་ཀྱི་ཡོད་ཅིང་། ལྷག་པར་དུ། གསང་ཚིག་ཧ་ཅང་ལས་སླ་བོ་དང་སེམས་ལ་དྲན་ཆོག་ཆོག་དེ་འདྲ་བཟོ་གི་ཡོད། གསང་ཚིག་ལས་སླ་བོ་དང་དྲན་ཆོག་ཆོག་དེ་འདྲ་བཟོས་ན། དེ་མི་གཞན་གྱིས་ཀྱང་ཚོད་དཔག་བྱེད་སླ་བ་ཡོད། ལྷག་པར་དུ། ང་ཚོས་གསང་ཚིག་དེ་བོད་དང་བོད་པའི་འཐབ་རྩོད་ལ་འབྲེལ་བའི་ལོ་དང་ཟླ་བ། དུས་དྲན་སོགས་ཀྱི་མིང་བཀོལ་ནས་བཟོ་གིཡོད་པ་མ་ཟད་། ད་དུང་། སོ་སོའི་སྐྱེས་ཡུལ་དང་སྐྱེས་ཚེས། ཕ་མའི་མིང་། དགོན་པ་དང་སློབ་གྲྭ་སོགས་ཀྱི་མིང་བེད་སྤྱོད་བྱས་ཡོད། འདིས་ཅི་ཞིག་སྟོན་གྱི་ཡོད་ཅེ་ན། ང་ཚོས་དྲ་ཐོག་གི་སོ་སོའི་བདེ་འཇགས་ལ་དོ་གལ་བྱེད་ཀྱི་མེད་པ་དེ་སྟོན། ད་ནི་སྔོན་ཆད་དང་འདྲ་གི་མ་རེད། གནས་སྟངས་མང་པོ་ལ་འགྱུར་བ་ཕྱིན་ཡོད་པ་རེད། ཇི་ཙམ་ང་ཚོས་ཉེན་སྲུང་མེད་པར་དྲ་ཐོག་གི་གློག་འཕྲིན་དང་འཕྲིན་ཐུང་གླེང་མོལ།(དཔེར་ན། གནམ་ཀླད་(Skype)དང་ཁེ་ཁེ(QQ)།སོགས) སྤྱི་ཚོགས་འབྲེལ་མཐུད་དྲ་བ།(དཔེར་ན། ངོ་དེབ་(Facebook)དང་རིན་རིན་(Renren)ཟེར་བ་སོགས) ཟིན་བྲིས་(འཕྲུལ་སྒྲ་དང་བེས་པོ་ལ་སོགས) སོགས་བརྒྱུད་ནས་འབྲེལ་བ་བྱས་ན། དེ་ཙམ་གྱིས་རང་ཉིད་གཅིག་པོ་མ་ཡིན་པར་སྤྱི་ཚོགས་ཧྲིལ་བོ་ཉེན་ཁའི་གཡང་ལ་འདེད་ཀྱི་ཡོད། ང་ཚོས་ཤེས་གསལ་བཞིན། མི་མང་པོའི་གློག་འཕྲིན་ལ་གཞན་གྱིས་ལྐོག་ལྟ་དང་ཡིག་ཆ་རྐུ་འཁྱེར། གསང་བ་ཕྱི་འཁྱེར་སོགས་ཀྱི་གནས་ཚུལ་འབྱུང་གིན་ཡོད་ཅིང་། འདི་དག་ཀུན་གྱི་འབྱུང་རྩ་ནི་གསང་ཚིག་བརྟན་པོ་མེད་པ་ལ་བརྟེན་ནས་ཡིན། གསང་ཚིག་མགོ་རྙོག་པོ་བཟོ་རྒྱུ་ནི་དཀའ་མོ་མིན། འདི་རུ་ང་ཚོས་ཁྱོད་ལ་གསང་ཚིག་བརྟན་པོ་དང་མགོ་རྙོག་པོ། རིང་པོ་བཅས་བཟོ་བའི་ཐབས་ལམ་ཞིག་སྤྲོད། འདི་ནི་དཔེ་མཚོན་ཙམ་ཡིན། གསང་ཚིག་དེའི་ཚིག་གྲུབ་ལྟེ་བ་ནི་I am such a fool that I keep forgetting my book at the Library! འདི་ཡིན། ཚིག་གྲུབ་འདི་ཁྱེད་ཀྱི་བློ་ལ་ངེས་ཡང་སླ། ཁྱེད་ཀྱིས་ཚིག་གྲུབ་འདིའི་མིང་ཚིག་རེ་རེའི་ཚིག་འགོ་མ་རྣམས་ཕྱོགས་གཅིག་ཏུ་བསྡུས་ཤིང་དེ་ཡང་འགའ་རེ་ཡིག་ཆེན་བཟོས་ནས་ད་གཟོད་གསང་ཚིག་ཡག་པོ་ཞིག་བཟོས། གསང་ཚིག་དེ་ནི་IasaftIkfmb@tLཡིན། གསང་ཚིག་འདི་ནི་གཞན་ལ་མཚོན་ལ་ཧ་ཅང་མགོ་རྙོག་པོ་དང་རིང་པོ་བཅས་ཡིན་པ་མ་ཟད་ལས་སླ་བོར་རྐུ་འཁྱེར་བྱེད་ཧ་ཅང་དཀའ། ལྷག་པར་དུ། བརྗོད་རྒྱུ་ཞིག་ལ་གསང་ཚིག་དེ་སུ་གང་ལ་ཡང་མ་སྟོན། ཁྱེད་ཀྱི་གསང་ཚིག་དེ་ཁྱེད་རང་གཅིག་པོའི་ཆེད་དུ་མིན་པར། དེ་ཁྱེད་དང་དྲ་ཐོག་ནས་འབྲེལ་བ་ཡོད་པའི་མི་མང་པོའི་བདེ་འཇགས་དང་ཡང་འབྲེལ་བ་ཡོད།

༤) བཤེར་ཆས་ཉེན་སྲུང་བྱོས།(HTTPS) ཁྱེད་ཀྱི་དྲ་ཐོག་ལོ་རྒྱུས་གཙང་བཟོ་བྱོས།

ཁྱེད་ནས་བཤེར་ཆས་ཁ་ཕྱེས་ཐེངས་རེར། ངེས་པར་དུ་དྲ་འབྲེལ་གྱི་འགོར་https://དེ་སྣོན་རོགས། དྲ་ཚིགས་གྲགས་ཅན་རྗེ་མེལ་དང་ངོ་དེབ་སོགས་ཀྱིས་HTTPSདེ་བེད་སྤྱོད་གཏོང་གི་ཡོད་ན་ཡང་། གཞན་གྱི་འཇབ་རྒོལ་མ་ཡོང་བའི་སླད་དུ། རྗེ་མེལ་ལྟ་བུ་སྒོ་འབྱེད་པའི་སྐབས་སུ་ཡང་ gmail.com ལྟ་བུ་མ་བཏགས་པར་ https://gmail.com ཧྲིལ་བོ་བཏགས་ན་ཉེན་སྲུང་གི་ནུས་བ་ཆེ། HTTPS ཡིས་ཁྱོད་ཀྱིས་ཉུལ་སའི་དྲ་ཚིགས་དང་དྲ་ཐོག་གི་ལས་ཀ། ད་དུང་ཁྱེད་རང་ནང་འཛུལ་བྱེད་སའི་གློག་འཕྲིན་སོགས་ཚང་མ་གསང་སྡོམ་བྱེད་ཀྱི་ཡོད། དེའི་གོ་དོན་ནི། གཞན་གྱིས་ཁྱེད་ཀྱིས་དྲ་ཚིགས་གང་བསྔོགས་གི་ཡོད་པ་དང་གློག་འཕྲིན་ཁ་བྱང་གང་ལ་འཛུལ་གི་ཡོད་པ་སོགས་བལྟ་མི་ཐུབ།

སེམས་ལ་ཉར་རྒྱུ་ཞིག་ལ། ཁྱེད་ནས་སྒེར་གྱི་གློག་ཀླད་དང་སྤྱི་སྤྱོད་གློག་ཀླད་སོགས་གང་ཞིག་བེད་སྤྱོད་བཏང་རུང་དེའི་རྟག་དུ་ཁྱེད་རང་གི་བཤེར་ཆས་ཀྱི་ལོ་རྒྱུས་དེ་གསུབ། གལ་སྲིད་ཁྱེད་ཀྱིས་གྷོ་རྒལ་ཁི་རོམ་(Google Chrome)གི་བཤེར་ཆས་བེད་སྤྱོད་གཏོང་གི་ཡོད་ཚེ། ཁྱེད་ཀྱིས་ Incognito window ཟེར་བ་དེ་བེད་སྤྱོད་བཏང་ཆོག ཁྱེད་ཀྱིས་བཤེར་ཆས་ཁ་བརྒྱབ་པའི་རྗེས་སུ་ Incognito window ཡིས་ཁྱེད་ཀྱི་བཤེར་ཆས་ཀྱི་འཚོལ་ཞིབ་ལོ་རྒྱུས་དེ་དྲ་ཐོག་ལ་མི་ཉར། ལྦ་མེ་(Fire Fox)བཤེར་ཆས་ལ་གདམ་ཀ་ཡོད་ཅིང་དེ་ལ་ Private Browsingཟེར། ཡིན་ན་ཡང་། སེམས་ལ་ཉར་་དགོས་བ་ཞིག་ལ། བཤེར་ཆས་འདི་ཡིས་ཁྱེད་ཀྱི་དྲ་ཚིགས་གང་ལ་ཉུལ་དང་མ་ལག་གང་ཞིག་བེད་སྤྱོད་བཏང་མིན་སོགས་ཀྱི་རྐང་རྗེས་མི་འཇོག་ན་ཡང་། ཁྱེད་ལ་དྲ་རྒྱའི་མཐུན་རྐྱེན་སྤྲོད་མཁན་དང་གསང་བའི་ལས་ཁུངས་། ཁྱོད་ལ་ལྐོག་ལྟ་བྱེད་མཁན་ཚོས་ཁྱེད་ཀྱིས་དྲ་ཚིགས་གང་ལ་ཉུལ་གི་ཡོད་པ་ཤེས་གི་རེད། ད་དུང་། ཁྱེད་ཀྱིས་ཤེས་དགོས་རྒྱུ་ཞིག་ལ། གལ་སྲིད་ཁྱེད་ཀྱི་གློག་ཀླད་དུ་དྲ་འབུ་འཛུལ་ཡོད་ཚེ། ཁྱེད་ཀྱིས་མཐེབ་གཞོང་ཐོག་ཅི་ཞིག་བྲིས་བ་དང་ཐ་ན་ཁྱེད་ཀྱི་མིང་དང་གསང་ཚིག་བཅས་ཀྱང་བརྐུ་ལ་ཤོར་སྲིད། དེར་བརྟེན། ནམ་རྒྱུན་ཁྱེད་ཀྱི་གསང་ཚིག་དེ་བཤེར་ཆས་ཁོངས་སུ་ཉར་ཚགས་མ་བྱེད། ལྷག་པར་དུ། གློག་འཕྲིན་སོགས་ལ་ནང་འཛུལ་བྱེད་དུས་གསང་ཚིག་དྲན་པའི་གདམ་ཀ་དེ་ལ་གཡོལ་རོགས།

༥) ར་སྤྲོད་རིམ་པ་གཉིས།

དྲ་ཐོག་ཏུ་སྒེར་གྱི་བདེ་འཇགས་དང་ཉེན་སྲུང་གལ་ཆེན་པའི་བགྲོ་གླེང་མང་ནས་མང་དུ་འགྲོ་བ་དང་ལྷན་དུ། ཚོང་ལས་ཁང་དང་དངུལ་ཁང་སོགས་ལ་དྲ་ཐོག་ནས་འཇབ་རྒོལ་མང་པོ་བྱུང་བའི་རྗེས་འབྲས་ལྟ་བུར། དྲ་ཐོག་གི་ཞབས་ཞུའི་རིགས་མང་པོ་ཞིག་ལ་ར་སྤྲོད་རིམ་པ་གཉིས་(2-Step Verification)བརྒྱུད་དགོས་བའི་བྱེད་ལས་དེ་བྱུང་། གྷོ་རྒལ་(Google)ནི་ར་སྤྲོད་རིམ་པ་གཉིས་ཀྱི་བྱེད་ཐབས་དེ་འགོ་འཛུགས་མཁན་ཐོག་མའི་གྲས་ཡིན་ལ་ཁོང་ཚོས་ང་ཚོའི་གསང་ཚིག་གི་སྒང་ལ་ར་སྤྲོད་རིམ་པ་གཉིས་ཀྱི་བདེ་འཇགས་ཀྱི་མཐུན་རྐྱེན་སྦྱོར་གི་ཡོད། ར་སྤྲོད་རིམ་པ་གཉིས་དེ་ནི། ཁྱེད་ཀྱིས་སོ་སོའི་གློག་འཕྲིན་ཁ་ཕྱེས་ཐེངས་རེར། ཁྱེད་ཀྱི་ལག་འཁྱེར་ཁ་པར་ཐོག་ཨང་ཚབ་ཞིག་འབྱོར་གི་རེད། དེ་ཡང་། ལྷག་པར་དུ་ཁྱེད་ཀྱིས་རྒྱུན་སྤྱོད་བྱེད་ཀྱི་མེད་པའི་གློག་ཀླད་གཞན་པའི་སྟེང་ནས་གློག་འཕྲིན་ཁ་ཕྱེས་ཚེ་དེ་ལྟར་འབྱུང་གི་རེད། གལ་སྲིད། མི་ཞིག་གིས་ཁྱེད་ཀྱི་གསང་ཚིག་ལ་གཏོར་བཅོམ་བཏང་ནས་ཁྱེད་ཀྱི་གློག་འཕྲིན་ཁོངས་སུ་སིམ་འཛུལ་བྱེད་པར་བརྩམ་ཚེ། ཁྱེད་ཀྱི་ལག་འཁྱེར་ཁ་པར་སྟེང་ལ་ཨང་ཚབ་དེ་འབྱོར་གི་རེད་ལ། ཨང་ཚབ་དེ་མེད་པར་གཞན་སུ་གང་གིས་ཀྱང་ཁྱེད་ཀྱི་གློག་འཕྲིན་ཁ་ཕྱེས་ཐུབ་གི་མ་རེད། གློག་འཕྲིན་ཞབས་ཞུ་གྲགས་ཆེ་བའི་རིགས་སྟེ་རྗེ་མེལ་(Gmail)དང་ཡ་ཧོའོ(Yahoo)། ཧོ་ཁྲི་མེལ།(Hotmail) སྒྲི་རོབ་སྤོ་ཁུ་སུ(dropbox)་སོགས་ཀྱིས་བྱེད་ཐབས་འདི་བེད་སྤྱོད་གཏོང་གི་ཡོད།

༦) སྤྱི་ཚོགས་འབྲེལ་མཐུད་དྲ་བ་ཉེན་སྲུང་ཡོད་པ་བྱོས།

ཉེ་བའི་ལོ་འགའི་སྔོན་ནས། འཛམ་གླིང་ཡུལ་གྲུ་གང་སར་འཐོར་བའི་བོད་མི་ཚོས་ཀྱང་སྤྱི་ཚོགས་འབྲེལ་མཐུད་དྲ་བ་དང་ཟིན་བྲིས་སོགས་བེད་སྤྱོད་གཏོང་འགོ་ཚུགས་ཡོད། སྔོན་ཆད་དང་མི་འདྲ་བར། ང་ཚོས་རང་གི་ནང་མི་དང་གྲོགས་པོ་གཅིག་པོ་མ་ཡིན་པར། སྔོན་ཆད་ངོ་མི་ཤེས་བའི་བོད་མི་མང་པོར་སྤྱི་ཚོགས་འབྲེལ་མཐུད་དྲ་བ་བརྒྱུད་ནས་གྲོགས་སྒྲིག་ཐུབ་གི་ཡོད། སྡིངས་ཆ་འདི་ཡིས་ང་ཚོའི་སྤྱི་ཚོགས་ཁྲོད་དུ་བགྲོ་གླེང་དང་རྩོད་པ་བཅས་ཀྱི་གླེང་སྟེགས་བསྐྲུན་ཡོད་པ་མ་ཟད་སོ་སོའི་ཉེ་འཁོར་ལ་འབྱུང་བཞིན་པའི་གནས་ཚུལ་མང་པོ་ཤེས་རྟོགས་ཀྱང་ལས་སླ་རུ་བཏང་ཡོད། འབྲེལ་མཐུད་དྲ་བ་འདི་དག་ང་ཚོ་སྐྱེ་བོ་སྒེར་བ་ཙམ་མ་ཡིན་པར་སྤྱི་ཚོགས་ཁྱོན་ཡོངས་ལ་གལ་ཆེ་བ་ཆགས་པ་དང་དུས་མཉམ་དུ། དེས་ང་ཚོ་དང་ང་ཚོའི་སྤྱི་ཚོགས་ལ་འཁྱེར་ཡོང་བའི་ཉེན་ཁ་ཡང་ཚད་མཐོ་རུ་འགྲོ་གི་ཡོད། དེར་བརྟེན། སྤྱི་ཚོགས་འབྲེལ་མཐུད་དྲ་བའི་རིགས་སྟེ་ངོ་དེབ་ལྟ་བུ་བེད་སྤྱོད་གཏོང་ན། དུས་རྟག་པར་བདེ་སྲུང་(Security)དང་སྒེར་སྲུང་གི་གདམ་ཀ་(Privacy options)དེ་དག་ངེས་པར་དུ་བེད་སྤྱོད་ཐོངས། ལྷག་པར་དུ། སོ་སོར་ཆ་རྒྱུས་མེད་པའི་ཉེར་སྤྱོད་རིགས་ངོ་དེབ་སྟེང་ལ་ནང་འཇུག་མ་བྱེད། སེམས་ལ་དྲན་རྒྱུ་ཞིག་ལ། ངོ་དེབ་སྟེང་ལ་ཡང་ར་སྤྲོད་རིམ་པ་གཉིས་ཅན་གྱིས་བྱེད་ཐབས་དེ་བེད་སྤྱོད་བཏང་ཆོག་གི་རེད།

༧) སོ་སོ་ཉེན་སྲུང་བྱེད་ཐུབ་མཁན་གྱི་གློག་འཕྲིན་ཁ་བྱང་ཡག་པོ་དེ་འདྲ་འདེམས།

དྲ་ཐོག་ཏུ་གློག་འཕྲིན་ཞབས་ཞུ་མང་པོ་ཡོད་ཙང་། ང་ཚོར་ཡག་ཤོས་དེ་གདམས་པའི་གོ་སྐབས་ཡོད་པ་རེད། ང་ཚོས་གློག་འཕྲིན་ཁ་བྱང་འཚོལ་བའི་སྐབས་སུ། ང་ཚོས་བལྟ་ས་གཙོ་བོ་ཞིག་གིས་གློག་འཕྲིན་ཁ་བྱང་དེ་ཡིས་སྤྲོད་པའི་ཉེན་སྲུང་གི་ནུས་བ་དེ་ཡིན། དེར་བརྟེན། གློག་འཕྲིན་ཁ་བྱང་གདེམས་དུས་སེམས་ལ་ངེས་དགོས་བའི་གནད་དོན་གཉིས་ནི། དང་པོ། གློག་འཕྲིན་ཁ་བྱང་དེས་HTTPS མཁོ་སྤྲོད་བྱེད་གི་ཡོད་མེད་བལྟོས། གཉིས་པ། གློག་འཕྲིན་ཁ་བྱང་དེ་ལ་རིམ་པ་གཉིས་ཅན་གྱི་ར་སྤྲོད་ཀྱི་བྱེད་ཐབས་དེ་ཡོད་མེད་བལྟོས། གནད་དོན་འདི་གཉིས་སེམས་ལ་ངེས་རྒྱུ་ཧ་ཅང་གལ་ཆེ།

༨) ཟུར་སྣོན་དང་ཁ་བྲལ།

ང་ཚོས་སྤྱིར་བཏང་གི་གློག་འཕྲིན་སྐོར་ལ་ཅུང་ཟད་གླེང་ཚར་བ་རེད། ད་ནི། ང་ཚོས་ནམ་རྒྱུན་གློག་འཕྲིན་བརྒྱུད་ཡིག་ཆ་བགོ་འགྲེམས་བྱེད་སྟངས་སྐོར་ལ་རོབ་ཙམ་གླེང། ང་ཚོས་ཟླ་བ་མང་པོའི་སྔོན་ལ། ཟུར་སྣོན་དང་ཁ་བྲལ་ཟེར་བ་ཞིག་གོ་མྱོང་མི་འདུག་གམ། གང་ཞིག་སྟབས་བདེ་བྱེད་པ་དེས་མཚམས་རེར་ང་ཚོ་ཉེན་ཁའི་གནས་སུ་སྐྱེལ་གི་ཡོད། མི་སྒེར་དང་ཚོང་ལས་ཁང་། སྲིད་གཞུང་བཅས་ཀྱིས་དྲ་འབུ་ཡོད་པའི་གློག་འཕྲིན་བརྒྱུད་ཁྱེད་ཀྱི་གནས་ཚུལ་རྐུ་འཁྱེར་བྱེད་པ་དང་གཞན་ལ་བཙོང་བ་བཅས་བྱེད་པ་མ་ཟད་། བྱེད་སྟངས་དེས་ཁྱེད་རང་གཅིག་པོ་མ་ཡིན་པར་ཁྱེད་དང་དྲ་འབྲེལ་ཡོད་མཁན་ཚང་མ་ཡང་བརྡབ་གསིག་ཆེན་པོ་གཏོང་གི་རེད། དྲ་འབུ་ཡོད་པའི་ཟུར་སྣོན་རིགས་ཁ་འབྱེད་པ་དང་དེ་ལ་བལྟ་བ་དེས་ཁྱོད་ལ་དཀའ་ངལ་མང་པོ་འཁྱེར་ནས་ཡོང་སྲིད་། ༡) དེ་ཡིས་ཁྱེད་ཀྱི་མིང་དང་གསང་ཚིག་སོགས་ཁྱེད་ཀྱིས་གློག་ཀླད་སྟེང་བྲིས་བ་ཚང་མ་རྐུན་འཁྱེར་ཐུབ། ༢) དེ་ཁྱེད་ཀྱི་པར་ཆས་དང་སྐུད་མེད་ཁ་པར་གྱི་ཁོངས་སུ་འཛུལ་ནས་རྒྱབ་ནས་ཁྱོད་ལ་ལྐོག་ལྟ་དང་ལྐོག་ཉན་བྱེད་ཐུབ། ༣) དེ་ལྐོག་ནས་ཁྱེད་ཀྱི་གློག་ཀླད་དུ་འཛུལ་ནས་ཁྱེད་ཀྱི་ཡིག་ཆ་ཁག་བསྣོག་ཐུབ། གང་ལྟར། ཇི་སྲིད་ང་ཚོས་ཡིག་ཆ་བགོ་བའི་གོམས་གཤིས་སྡུག་པོ་དེ་བརྗེ་བོ་མ་བརྒྱབ་པར་དུ། ང་ཚོར་རྟག་ཏུ་དཀའ་ངལ་འཕྲད་སྲིད་པ་མ་ཟད་མི་ཚེ་གང་བོར་འགྱོད་པ་སྐྱེས་བའི་གནད་དོན་ཡང་འབྱུང་སྲིད་། རྒྱུ་མཚན། དེ་རིང་སང་ཉིན་གྱི་ང་ཚོའི་མི་ཚེའི་ཆ་ཤས་མང་པོ་ཞིག་དྲ་ཐོག་ལ་བརྟེན་ནས་ཡོད།

ཟུར་སྣོན་བརྒྱུད་ཡིག་ཆ་བགོ་བཤའ་བྱེད་པ་མ་ཡིན་པར་ང་ཚོས་ཉེན་སྲུང་ལྡན་པའི་ལམ་ཁ་གཞན་པ་ཡོད་པ་རེད། དེ་ཡང། གལ་སྲིད་ཁྱོད་ཀྱིས་རྗེ་མེལ་གློག་འཕྲིན་ཁ་བྱང་བེད་སྤྱོད་གཏོང་གི་ཡོད་ཚེ། རྗེ་མེལ་ལ་ Drive (སྔོན་ཆད་འདིའི་མིང་ལ GoogleDocཟེར) ཟེར་བའི་པར་གཞི་ཞིག་ཡོད་པ་རེད། དེ་བེད་སྤྱོད་གཏོང་རོགས། གཞན་www.dropbox.comདང www.ge.tt སོགས་བེད་སྤྱོད་བཏང་ནས་ཡིག་ཆ་བགོ་བཤའ་བྱས་ནས་ཧ་ཅང་བདེ་འཇགས་དང་ཉེན་སྲུང་ཡག་པོ་ཡོད་པ་རེད། དེར་བརྟེན། འདི་དག་བེད་སྤྱོད་གཏོང་རྒྱུ་འགོ་ཚུགས།

༩) མ་བསྣུན་སྔོན་ལ་བསམ་བློ་ཐོངས།

ང་ཚོར་ཡོད་པའི་གོམས་གཤིས་ངན་པ་གཞན་ཞིག་ནི། སོ་སོའི་གློག་འཕྲིན་ཡིག་ཟམ་ལ་འབྱོར་བའི་འབྲེལ་ཐག་ཡོད་ཚད་ལ་བསྣུན་པ་དེ་རེད། འབྲེལ་ཐག་ཤེས་མ་ཤེས་གཉིས་ལ་བསྣུན་པ་ལ་བརྟེ་ནས་གཞན་གྱིས་ལས་སླ་བོའི་སྒོ་ནས་ང་ཚོའི་གནས་ཚུལ་མང་པོ་བརྐུ་འཁྱེར་བྱེད་ཀྱི་ཡོད། གལ་སྲིད་ཁྱོད་ནས་གཞན་ལ་འབྲེལ་ཐག་ཞིག་ངེས་པར་དུ་གཏོང་དགོས་ཚེ། འབྲེལ་ཐག་དེ་ཁ་གཏོར་ནས་གཏོང་རོགས། ( དཔེར་ན https: //youku. com/ འདི་ལྟར) གལ་སྲིད་ཁྱོད་ལ་འབྲེལ་ཐག་ཞིག་འབྱོར་ཚེ། འབྲེལ་ཐག་དེ་གཏོང་མཁན་ངོ་ཤེས་དེ་འདྲ་ཡིན་རུང་། དེར་བསྣུན་རྐྱང་མ་བྱས་པར་འབྲེལ་ཐག་དེ་དངོས་མ་ཡིན་མིན་ལ་བརྟག་དཔྱད་གཏོང་རྒྱུ་ཧ་ཅང་གལ་ཆེ། བརྟག་དཔྱད་གཏོང་སྟངས་ཡག་ཤོས་ནི། འབྲེལ་ཐག་དེའི་སྟེང་ལ་མ་བསྣུན་པར། ཁྱོད་ཀྱི་གློག་ཀླད་ཀྱི་ཙི་ཙིའི་མདའ་རྩེ་དེ་ག་ལེར་འབྲེལ་ཐག་དེའི་སྟེང་ལ་ཞོག་དང་། བཤེར་ཆས་ཀྱི་གཤམ་ངོས་སུ་འབྲེལ་ཐག་དེ་བསྐྱར་དུ་ཤར་གི་རེད། གལ་སྲིད་དངོས་མ་ཡིན་ན། འབྲེལ་ཐག་གཅིག་པ་གཅིག་རྐྱང་ཤར་གི་རེད། གཞན། དྲ་འབུ་ཡོད་པའི་འབྲེལ་ཐག་སྒོ་འབྱེད་པ་ནི་ཟུར་སྣོན་ཁ་ཕྱེས་བ་དང་གཅིག་མཚུངས་རེད། དྲ་འབུ་ཅན་གྱི་འབྲེལ་ཐག་དེ་འདྲས་ཁྱེད་རང་དྲ་ངོས་གསར་བ་ཞིག་ཏུ་འཁྲིད་སྲིད་པ་མ་ཟད་ཁྱེད་ཀྱི་གསང་ཚིག་སོགས་ནང་འཇུག་ཡང་བྱེད་འཇུག་སྲིད། བྱེད་ཐབས་འདི་བཀོལ་ནས་མི་མང་པོའི་གསང་ཚིག་སོགས་རྐུན་མར་ཤོར་གྱི་ཡོད། ད་དུང་། དྲ་འབུ་ཅན་གྱི་འབྲེལ་ཐག་སྒང་ན་བསྣུན་པ་དེས་ཁྱེད་ཀྱི་གློག་ཀླད་སྟེང་ལ་དྲ་འབུ་འབོར་ཆེན་འཁྱེར་ཡོང་སྲིད་པ་མ་ཟད་དེ་ཡིས་ཁྱོད་ཀྱི་བྱེད་ལས་ཚང་མ་ལྐོག་ལྟ་བྱེད་གི་རེད། ཟུར་སྣོན་ནང་བཞིན། འབྲེལ་ཐག་གང་བྱུང་ལ་མི་བསྣུན་པ་དང་འབྲེལ་ཐག་གང་བྱུང་གཞན་ལ་མི་གཏོང་བའི་གོམས་གཤིས་དེ་འཇགས་པར་བྱེད་པ་ལ། འབྲེལ་ཐག་གཏོང་དུས་འབྲེལ་ཐག་ཁ་གཏོར་ནས་གཏོང་རོགས། འབྲེལ་ཐག་འབྱོར་ན་དེ་ལ་ངེས་པར་དུ་བརྟག་དཔྱད་གཏོང་རོགས།

༡༠) ཡིད་རྟོན་འཕེར་བའི་དྲ་བ་ནས་མཉེན་ཆས་ཕབ་ལེན་བྱོས། དུས་རྟག་དུ་མཉེན་ཆས་རིགས་གསར་སྣོན་བྱོས།

ང་ཚོས་སོ་སོའི་ལས་ཀའི་ཆེད་དུའམ་ཡང་ན་སོ་སོ་སྐྱིད་པའི་སླད་དུ། ང་ཚོས་དྲ་ཐོག་ནས་བེད་སྤྱོད་ཡག་པོ་ཡོད་པར་མཐོང་བ་མང་པོ་ཞིག་ཕབ་ལེན་བྱེད་ཀྱི་ཡོད་ལ། ང་ཚོས་མཉེན་ཆས་ཤིག་ཡིན་ན་དེ་གང་ནས་ཕབ་ལེན་བྱེད་དང་དེ་བརྟན་པོ་ཅི་ཙམ་ཡོད་མེད་སོགས་ཀྱི་སྐོར་ལ་བསམ་བློ་དེ་ཙམ་གཏོང་གི་མེད། དྲ་འབུ་ཡོད་པའི་མཉེན་ཆས་རིགས་ཀྱིསང་ཚོའི་གློག་ཀླད་ཀྱི་མ་ལག་ཧྲིལ་བོར་དལ་བར་གཏོང་སྲིད་ལ་ང་ཚོའི་ཡིག་ཆ་ཁག་བརྐུ་འཁྱེར་ཡང་བྱེད་སྲིད། འདི་ཡིས་མཚམས་རེར། འཇབ་རྒོལ་བྱེད་མཁན་རྣམས་ལ་ང་ཚོའི་གློག་ཀླད་བརྒྱུད་གཞན་གྱི་གནས་ཚུལ་བརྐུ་བའི་ཟམ་པ་ལྟ་བུའི་མཐུན་རྐྱེན་ཡང་བསྐྲུན་སྲིད། དེར་བརྟེན། མཉེན་ཆས་ངོ་ཤེས་མི་ཤེས་གཉིས་ཀ་ཕབ་ལེན་བྱེད་རྒྱུ་མཚམས་འཇོག་དགོས་བ་མ་ཟད། གལ་སྲིད་ངེས་པར་དུ་ཕབ་ལེན་བྱེད་དགོས་ཚེ། མཉེན་ཆས་དེའི་ཁུངས་ཨ་མའམ་དྲ་ཚིགས་ངོ་མ་དེ་ནས་ཕབ་ལེན་བྱེད་དགོས། ལྷག་པར་དུ། ཁྱེད་ཀྱིས་ཕབ་ལེན་ཟིན་པའི་མཉེན་ཆས་ཡག་པོའི་རིགས་དེ་ཚོ་ཡང་དུས་ནས་དུས་སུ་གསར་སྣོན་བྱེད་རྒྱུ་ཧ་ཅང་གལ་ཆེ།

གོང་དུ་གླེང་ཟིན་པའི་དོན་ཚན་བཅུ་པོ་འདི་ནི། ད་བར་དུ་ངེད་ཀྱིས་བྲིས་བའི་རྩོམ་ཡིག་འགའ་ཡི་ནང་དོན་སྙིང་བསྡུས་ལྟ་བུ་ཞིག་ཡིན། ཁྱེད་ཅག་གིས་མུ་མཐུད་དུ་ཀློགས་དང་། ངེད་ཀྱིས་ཁྱེད་ཅག་གི་མདུན་ལ་མུ་མཐུད་དུ་བརྫངས་ངེས།

ངའི་གློག་འཕྲིན་ཁ་བྱང་། jigmeynubpa@gmail.com

(འཇིགས་མེད་ནུབ་པ་ནི། ཡིག་སྒྱུར་དང་རྩོམ་འབྲི། རྩོམ་སྒྲིག་བཅས་ཀྱི་ཕྱག་ལས་གནང་མཁན་བོད་རིགས་གཞོན་སྐྱེས་ཤིག་ཡིན)


རྩོམ་འདིའི་ནང་མཆན་ 9 བཀོད་འདུག

9 Responses to དྲ་ཐོག་ནས་མི་ཚེ་སྐྱེལ་ན། ལམ་ཁ་བཅུ་འདི་སེམས་ལ་ཉེ་བར་ཞོག

  1. ཡར་འཕེལ་ ནས།

    བཀའ་དྲིན་ཆེ་ཞུ་རྒྱུ་ལགས།

  2. བསྟན་པ་ ནས།

    ཤེས་བྱ་འདིའི་རིགས་ནི་ང་ཚོར་ཕན་ཐོགས་ཆེན་པོ་འདུག་ལ་བློ་སྒོ་ཕྱེས་སོང་སོང་།

  3. ཀླུ་སྨྱོན་ ནས།

    ང་ལ་ཁ་པར་སྐོར་གྱི་དྲི་བ་ཞིག་འདུག ཟླ་ཤས་སྔོན་ང་དང་བོད་པ་ཞིག་གི་བར་ཁ་པར་ཨང་གྲངས་བརྒྱུད་ནས་འཕྲིན་ཐུང་བསྐུར་རེས་བྱས། ཉེ་ཆར་མིང་གཅིག་ཡིན་པ་ལ་ཨ་པར་ཨང་གྲངས་གཞན་པ་ཞིག་ཀྱང་ངའི་ཁ་པར་ནང་འཛུལ་འདུག ངས་ཐོག་མར་དེའི་ཁ་པར་ཨང་གྲངས་ལ་མ་བལྟས་པར་སྔོན་མའི་གྲོགས་པོ་དེ་ཡིན་ཤག་གིས་པར་དང་ཡིག་ཐུང་དེ་འདྲ་བསྐུར་བར། མི་དེས་ངས་ཁྱེད་ངོ་ཤེས་ཀི་མེད། ཁྱེད་སུ་ཡིན་སོགས་ཚུར་དྲི་བ་དྲིས་སོང་། ང་མགོ་འཐོམས་ནས་བསྡད། མཐར་ཁ་པར་གྲངས་མི་གཅིག་པ་དེ་མཐོང་ནས་མི་དེའི་ཨང་གྲངས་དེ་བསུབས་བཞག་པ་ཡིན། མི་དེའི་ཨང་གྲངས་སྔོན་མའི་མི་དེའི་འཕྲིན་ཐུང་གི་འཕྲོས་སུ་ཇི་ལྟར་བྱས་ནས་བསླེབས་པ་རེད།

  4. རྨེའུ་དཀོན་རྒྱམ་ ནས།

    དངོས་གནས་ཕན་ཐོགས་ཆེན་པོ་འདུག མུ་མཐུད་ནས་རྒྱུན་ཤེས་འདིའི་རིགས་དུས་ཐོག་ཏུ་སྤེལ་རོགས་ཞུ།
    ཐུགས་རྗེ་ཆེ།

  5. འཇིགས་མེད་ནུབ་པ་ ནས།

    དོན་རྐྱེན་འདིའི་རིགས་རྒྱུ་རྐྱེན་འགའ་ཤས་ལ་བརྟེན་ནས་འབྱུང་བཞིན་ཡོད།

    གཅིག
    ཁྱེད་ཀྱིས་ངོ་མི་ཤེས་བའི་མི་ཞིག་དང་ཁོང་གི་ཨང་གྲངས་གཉིས་ཀ་ཁྱོད་ཀྱི་ལག་འཁྱེར་ཁ པར་སྟེང་དུ་སླེབས་ཡོད་ན། གཅིག་བྱས་ན་ཁྱོད་ཀྱི་ལག་འཁྱེར་ཁ་པར་དེ་ལ་གཞན་གྱིས་སིམ་འཛུལ་བྱས་ཡོད་སྲིད། གལ་སྲིད་སིམ་འཛུལ་བྱས་ཡོད་ཚེ། ཁྱོད་ཀྱིས་གང་མགྱོགས་སོ་སོའི་ལག་འཁྱེར་ཁ་པར་གཙང་བཟོ་བྱེད་དགོས། ད་དུང་། ལག་འཁྱེར་ཁ་པར་གྱི་བཀོལ་སྤྱོད་མ་ལག་(Operating system)དེ་གསར་སྣོན (Update)བྱེད་དགོས། ཉེར་སྤྱོད་མ་ལག(Apps)་ངོ་མི་ཤེས་པའི་རིགས་ངོས་ལེན་བྱེད་མི་ཉན།

    གཉིས།
    རྒྱུ་རྐྱེན་གཞན་ཞིག་ནི། གལ་སྲིད་ཁྱོད་ཀྱི་ཁ་འཁྱེར་ཁ་པར་དེ་གནམ་ཀླད་(Skype)དང་སྐད་འཕྲིན(Wechat)། ངོ་དེབ(Facebook)།སོགས་ལ་མཐུད་ནས་ཡོད་ཚེ། དེ་ཚོ་གང་རུང་གི་སྟེང་དུ་ཡོད་པའི་ཉེར་སྤྱོད་མ་ལག་(Apps)དེ་འདྲས་ཁྱོད་ཀྱི་ལག་འཁྱེར་ཁ་པར་ངོས་སུ་དེ་ཚོའི་སྟེང་དུ་ཡོད་པའི་མི་རྣམས་དང་ཁོང་ཚོའི་ཁ་པར་ཨང་གྲངས་སོགས་ཀྱང་ཤར་བཅུག་གི་རེད། འདི་གཙོ་བོ་ཁྱོད་ཀྱི་ལག་འཁྱེར་ཁ་པར་གྱི་སྒྲིག་བཟོའི་(Setting)ཁོངས་ནས་བཅོས་དགོས།

  6. ཀླུ་སྨྱོན་ ནས།

    ཐུགས་རྗེ་ཆེ།

  7. དང་པོ།
    དེང་སྐབས་རིན་སྤྲོད་མ་དགོས་པ་ཕབ་ལེན་ནང་འཇུག་བྱེད་ཆོག་པའི་དུག་སེལ་མཉེན་ཆས་འདྲ་མིན་སྣ་ཚོགས་ཤིག་འདུག ཡིན་ནའང་། མང་པོ་ཞིག་ནི་ཕྱི་ཚུལ་གྱི་བཟོ་ལྟ་ཙམ་ལས་དོན་གྱིས་དུག་འགོག་ནུས་པ་ཆེན་པོ་མི་འདུག དེར་བརྟེན་དུག་སེལ་མཉེན་ཆས་གང་ཞིག་བེད་སྤྱོད་གཏོང་དགོས་མིན་ཐད་ཁ་ཕྱོགས་གསལ་བོ་གང་ཡང་མི་འདུག ནམ་རྒྱུན་རིན་སྤྲོད་མ་དགོས་པའི་དུག་སེལ་མཉེན་ཆས་གང་ཞིག་བེད་སྤྱོད་བྱས་ན་ལེགས་མིན་ལམ་སྟོན་ཞིག་གནང་རོགས།

    གཉིས་པ།
    གཞན་གྱིས་ཚུར་སྐུར་ཡོང་བའི་ཟུར་སྣོན་ཡིག་ཆ་དང་དྲ་ཐག་ལ་དྲ་འབུ་ཞུགས་ཡོད་མེད་ཇི་ལྟར་བརྟག་དཔྱད་བྱས་ན་ལེགས། ཡང་ན་སྒོ་མ་འབྱེད་སྔོན་ལ་དུག་སེལ་བྱེད་ཐབས་གང་དག་སྤྱད་ན་སྟབས་བདེ་བ་དང་ལེགས་པོ་ཡོད་མེད་ཐད་ལམ་སྟོན་ཅིག་གནང་རོགས།

    གསུམ་པ།
    རྒྱ་ནག་གི་མཉེན་ཆས་བཟོ་ཚོང་སྡེ་ཁག་ཕཱིན་ཞོན་གྱིས་བཟོས་པའི་༼སྐད་འཕྲིན(འཕྲིན་ཕྲན)༽བེད་སྤྱོད་བཏང་བ་ལ་བརྟེན་ནས། ལག་ཁྱེར་པར་འཁེག་འགྲོ་བ་སོགས་སྐྱོན་འདྲ་མིན་སྣ་ཚོགས་འཕྲད་ཀྱི་འདུག དེ་དག་སེལ་ཐབས་གང་དང་གང་ཡོད་མེད་སྐོར་དང་། དེ་བཞིན། དེང་སྐབས་བོད་མི་མང་པོ་ཞིག་གིས་སྐད་འཕྲིན་སྤྱད་དེ་བོད་ནང་བར་འབྲེལ་བ་གནང་བཞིན་ཡོད་སྟབས སྐད་འཕྲིན་བེད་སྤྱོད་བྱས་ན་གསར་བ་ཕྱིར་གྱར་གྱི་ཉེན་ཁ་གང་དག་ཡོད་སོགས་ཀྱི་ཐད་གཙོར་བཟུང་ཐོག སྐད་འཕྲིན་མཉེན་ཆས་འདིའི་དགེ་སྐྱོན་གང་ཡོད་ཐད་ནས་ངོ་སྤྲོད་ཅིག་གནང་རོགས་ཞུ།

  8. ཚེ་རིང་ལགས་ཀྱི་དྲི་བ་དག་གི་སྐོར་ལ་ངེད་ཀྱིས་སྔ་མོ་ནས་རྩོམ་ཡིག་འགའ་སྤེལ་ཚར་ཡོད། དེ་དག་ཀློགས་རོགས། ད་དུང་ཁ་གསལ་མ་བྱུང་ཚེ། ངེད་ཀྱིས་ལན་ཁ་གསལ་སྤྲོད་ངེས།
    དང་པོ།
    དུག་སེལ་མཉེན་ཆས་སྐོར་ལ། གལ་སྲིད་ཁྱོད་ཀྱིས་སྒེའུ་ཁུང་རྟགས་ཅན་བེད་སྤྱོད་གཏོང་གི་ཡོད་ན། དུག་སེལ་མཉེན་ཆས Microsoft Security Essentials བེད་སྤྱོད་ཐོངས། གལ་སྲིད་ཁྱོད་ཀྱིས་ཀུ་ཤུ་རྟགས་ཅན་གྱི་གློག་ཀླད་བེད་སྤྱོད་གཏོང་གི་ཡོད་ན། དུག་སེལ་མཉེན་ཆས Sophos བེད་སྤྱོད་ཐོངས།

    གཉིས།
    ཟུར་སྣོན་དང་ཡིག་ཆའི་སྐོར་ལ་ངེད་ཀྱིས་རྩོམ་ཞིག་སྤེལ་ཚར་ཡོད། དེ་ཀློགས་རོགས། འབྲེལ་ཐག http://karkhung.com/archives/138#more-138

    གསུམ།
    སྐད་འཕྲིན་གྱི་སྐོར་ལ་ཡང་ངེད་ཀྱིས་རྩོམ་ཐུང་ཞིག་སྤེལ་ཚར་ཡོད། དེ་ཀློགས་རོགས།
    འབྲེལ་ཐག http://karkhung.com/archives/1394#comments
    འདིའི་སྐོར་ལ་རྩོམ་རྒྱས་པ་ཞིག་འབྲི་གིན་ཡོད།

  9. ཨ་ ནས།

    དེས་ན། ཁྱེད་ཀྱིས་བར་སྐབས་གང་བྲིས་ཐབས་ཅད་དེབ་ཅིག་ལ་བཏབ་ནས། ང་ཚོར་ཧ་ཅང་གི་ལྟ་བདེ་ཞིག་བྱིན་ན། དགོངས་དག་ཧམ་པ་ཆེ་སོང་།

Write a Reply or Comment

Your email address will not be published. Required fields are marked *

*