“མི་རབས་གསར་པའི་སྙིང་ཁམས་ཀྱི་འཕར་ལྡིང་།”གི་ཁ་སྐོང་འགའ།(༤)

རྩོམ་པ་པོ་པད་མ་འབུམ།

ཡིག་སྒྱུར་བ། སྐལ་བཟང་ཉི་མ།
ཞུ་དག་པ། པད་མ་འབུམ།

སྨྱུག་མིང་།

“སྨྱུག་མིང་”ངམ་”པིར་མིང་”ཞེས་པའི་ཐ་སྙད་དང་། འདི་བེད་སྤྱོད་གཏོང་བ་ནི་བོད་ཀྱི་རྩོམ་རིག་གསར་བ་བྱུང་མ་ཐག་ནས་བྱུང་ཡོད་ཅིང་། མི་རབས་གསར་བའི་སྙིང་ཁམས་ཀྱི་འཕར་ལྡིང་གི་ནང་དུ་གྲོས་གླེང་བྱེད་འོས་ཀྱང་བྱེད་ལུས་སུ་གྱུར་བའི་བརྗོད་གཞི་ཞིག་ཡིན། སྨྱུག་མིང་ནི་རྒྱ་ནག་གི་རྩོམ་པ་པོ་རྣམས་ཀྱིས་བརྩམས་ཆོས་ཀྱི་སྟེང་ལ་རང་གི་སྐྱེས་མིང་མ་ཡིན་པར་མིང་གཞན་པ་ཞིག་འགོད་སྲོལ་ཡོད་པ་དེ་ལ་བོད་ནང་གི་རྩོམ་པ་པོ་རྣམས་ཀྱིས་ལད་ཟློས་བྱས་ནས་བྱུང་། དེ་ཡང་རྒྱ་སྐད་ཀྱི་笔名(Bi ming)ཟེར་བ་འདི་ཐད་སྒྱུར་བྱས་ནས་བྱུང་ཞིང་ད་ཕན་གྱི་བོད་ཡིག་གི་ཚིག་མཛོད་དང་རྒྱ་བོད་ཚིག་མཛོད་གང་ལ་ཡང་འཚོལ་དུ་མེད་པ་ཞིག་ཡིན།

རྒྱ་ནག་རང་ལ་སྨྱུག་མིང་གི་སྲོལ་འདི་མིན་རྒྱལ་རབས་དང་ཆིན་རྒྱལ་རབས་སྐབས་ནས་དར་ཡོད་པར་བཤད། དེ་དུས་རྒྱ་ནག་གི་སྤྱི་ཚོགས་སུ་སྒྲུང་གཏམ་རྩོམ་འབྲི་བྱེད་པ་ནི་ཐ་ཤལ་གྱི་ལས་ཤིག་ལ་བརྩི་སྲོལ་ཡོད་སྟབས། རྒྱ་ནག་གི་སྒྲུང་གཏམ་རྩོམ་པ་པོ་རྣམས་ཀྱིས་རང་རང་གི་བརྩམས་ཆོས་ལ་རང་མིང་ངོ་མ་གསང་ནས་སྨྱུག་མིང་འགོད་པར་གྲགས། དུས་རབས་གོང་མའི་སྟོད་ལ་གོ་མིན་ཏང་གི་སྐབས་སུ་རྒྱ་ནག་རྩོམ་པ་པོའི་ནང་དུ་སྨྱུག་མིང་འདོགས་མཁན་ཇེ་མང་དུ་གྱུར། ཐ་ན་༡༩༩༡ ལོར་བསྒྲིགས་གྲུབ་སྟེ་དཔེ་སྐྲུན་བྱས་པའི་”རྒྱ་བོད་ཤན་སྦྱར་ཚིག་མཛོད།”པའི་ནང་དུ་Bi ming ལ་”གསང་མིང་”ཞེས་འབྱུང་བ་མ གཏོགས་”སྨྱུག་མིང་”ཞེས་མི་འབྱུང་། དངོས་གནས་བྱས་ན་ཚིག་མཛོད་འདི་དཔེ་སྐྲུན་བྱེད་སྐབས་སྨྱུག་མིང་ཞེས་པའི་ཐ་སྙད་འདི་ཡིག་ཐོག་ལ་ཅི་ཙམ་ཁྱབ་ཡོད་མེད་མི་ཤེས་ཀྱང་། ངག་ཐོག་ལ་ཡོངས་ཁྱབ་ཀྱི་ཐ་སྙད་ཅིག་ཡིན།

མཁས་དབང་དུང་དཀར་བློ་བཟང་འཕྲིན་ལས་མཆོག་ནས་གནའ་རབས་ཀྱི་བོད་མིའི་རྩོམ་པ་པོའི་མིང་འདོགས་སྟངས་ལྔ་ཡོད་པར་གསུངས་ཏེ། དེ་དག་ནི་༡)རྩོམ་པ་པོ་རང་གི་རྒྱུན་གྲགས་ཀྱི་མིང་དང་། ༢)སྒྲ་རིག་པ་སྦྱངས་པའི་ཀུན་བཤད་ཀྱི་མིང། ༣)གྲུབ་མཐའི་ཆོས་སྐད་དང་མཐུན་པའི་མིང་། ༤)རྗེས་འབྲང་སློབ་མ་རྣམས་ཀྱིས་ཆེ་བསྟོད་བྱས་པའི་མིང་། ༥)གསང་མཚན་བཅས་སོ།

མིང་འདོགས་སྟངས་འདི་ལྔ་བོ་ལས་སྒྲ་རིག་པ་སྦྱངས་པའི་ཀུན་བཤད་ཀྱི་མིང་ཟེར་བ་འདི་དེང་སང་གི་སྨྱུག་མིང་ཟེར་བ་འདི་དང་ཆ་འདྲ་ས་རེ་ཡོད། མིང་རིགས་འདི་ནི་མི་སུ་ཞིག་གིས་ལེགས་སྦྱར་གྱི་སྒྲ་རིག་པ་སྦྱངས་ནས་ལེ་ཚན་གང་ཞིག་ཞིག་ལ་སླེབས་ན་སྒྲའི་དགེ་རྒན་གྱིས་གནང་། མིང་དེ་ཐོབ་རྗེས་སྤྱིར་བཏང་སྙན་རྩོམ་གྱིས་མཚོན་པའི་རིག་གནས་ཀྱི་བརྩམས་ཆོས་ཀྱི་སྟེང་ལ་འགོད་པ་མང་། དེང་སང་གི་སྨྱུག་མིང་ཟེར་བ་འདི་རྩོམ་རིག་གི་བརྩམས་ཆོས་ལ་མ་གཏོགས་མི་འགོད་པ་དང་འདྲ་མཚུངས་ཡིན། དེ་མ་གཏོགས་མིང་རིགས་པ་གཞན་པ་བཞི་བོ་དེ་དག་བརྩམས་ཆོས་གཅིག་པོ་ལ་མི་དབང་སྟབས་དེང་སང་གི་སྨྱུག་མིང་དང་འདྲ་བའི་ཆ་ཧ་ཅང་ཉུང་།

སྒྲ་རིག་པ་སྦྱངས་པའི་ཀུན་བཤད་ཀྱི་མིང་ཡོད་མཁན་ནི་ལོ་རབས་བརྒྱད་ཅུ་དང་དགུ་བཅུའི་ནང་ལ་རྩོམ་པ་པོ་སྐོར་ཞིག་ཡོད་འོས་ཆེ། དུས་རབས་གོང་མའི་ལོ་རབས་བརྒྱད་ཅུ་དང་དགུ་བཅུ་ནི་སྒྲ་དང་སྙན་ངག་གིས་མཚོན་པའི་སྲོལ་རྒྱུན་གྱི་རིག་གནས་བཅུ་སླར་གསོའི་ཆེད་དུ་གཞུང་སྒེར་གཉིས་ཀ་ནས་སློབ་སྦྱོང་བྱེད་མཁན་ཧ་ཅང་མང་བའི་དུས་སྐབས་ཤིག་ཡིན། སྒྲ་རིག་པ་སྦྱོང་མཁན་མང་ན་ཀུན་བཤད་ཀྱི་མིང་ཐོབ་མཁན་མང་བ་ཡང་རང་བཞིན་ཡིན། དཔེར་ན་ ༡༩༨༥ ལོ་ནས་ ༡༩༨༨ ལོའི་ནུབ་བྱང་མི་རིགས་སློབ་གྲྭའི་ང་ཚོ་བོད་ཀྱི་གནའ་ཡིག་ཞིབ་འཇུག་འཛིན་གྲྭ་ལ་མཚོན་ན་ང་ཚོ་སློབ་མ་བཅོ་ལྔ་ཡོད་ཅིང་། ང་ཚོ་ཚང་མས་སྒྲ་རིག་པ་སྦྱངས་ཏེ་ཀུན་བཤད་ཀྱི་མིང་ཡང་ཐོབ་ཡོད། ང་ཚོ་ལས་མང་ཆེ་བས་ད་བར་དུ་དཔྱད་རྩོམ་གྱིས་མཚོན་པའི་རྩོམ་ཡིག་སྣ་ཚོགས་བྲིས་དང་འབྲི་བཞིན་པ་ཡིན། ཡིན་ན་ཡང་ང་ཚོའི་ནང་ནས་རེབ་གོང་རྡོ་རྗེ་མཁར་ནས་རྡོ་རྗེ་སྒྲ་དབྱངས་རྒྱ་མཚོ་ཞེས་ཀུན་བཤད་ཀྱི་མིང་དེ་བེད་སྤྱོད་ཐེངས་རེ་ཟུང་བྱས་ཡོད་པ་མ་གཏོགས་གཞན་པ་བེད་སྤྱོད་བྱེད་མཁན་ཧ་ཅང་ཉུང་།

དུང་དཀར་བློ་བཟང་འཕྲིན་ལས་མཆོག་ནས་མ་གསུངས་པའི་སྲོལ་རྒྱུན་གྱི་རྩོམ་པ་པོའི་མིང་འདོགས་སྟངས་གཞན་པ་ཞིག་དེང་སང་ཡང་དར་ཁྱབ་ཤིན་ཏུ་ཆེ། དེ་ནི་སྐྱེས་མིང་ངམ། རབ་བྱུང་གི་མིང་ངམ། དགེ་སློང་གི་མིང་ལྟ་བུའི་སྔོན་ལ་མི་དེ་སྐྱེས་སའི་ས་ཆའི་མིང་སྦྱོར་བ་དེ་ཡིན། དཔེར་ན་ས་སྐྱ་ཀུན་དགའ་རྒྱལ་མཚན་དང་ཙོང་ཁ་བློ་བཟང་གྲགས་པ་ཟེར་བའི་མཚན་ལྟ་བུ་རྣམས་ཡིན།

སྐྱེས་མིང་ལྟ་བུའི་སྔོན་ལ་ཡུལ་མིང་སྦྱོར་བའི་རྒྱུ་མཚན་གཙོ་བོ་ཞིག་ནི་བོད་པ་ལ་སྐྱེས་མིང་འདྲ་མཚུངས་མང་བའི་སྟབས་ཀྱིས་ཡིན། དཔེར་ན། དུས་རབས་གོང་མའི་ལོ་རབས་བརྒྱད་ཅུའི་ནང་ལ། རྒྱ་ནག་ལན་ཀྲོའུ་ གྲོང་ཁྱེར་ན་ཡོད་པའི་ནུབ་བྱང་མི་རིགས་སློབ་གྲྭ་ཆེན་མོའི་བོད་ཡིག་སྡེ་ཚན་གཅིག་པོའི་ནང་ན་རྡོ་རྗེ་ཚེ་རིང་ཟེར་བའི་རྩོམ་འབྲི་མཁན་གཉིས་དང་། དཀོན་མཆོག་ཚེ་བརྟན་ཟེར་བའི་རྩོམ་འབྲི་མཁན་གཉིས་ཡོད། ཕྱིས་སུ་རྩོམ་བདག་གསལ་པོ་ཡོང་ཆེད་རྡོ་རྗེ་ཚེ་རིང་གཅིག་གི་ སྔོན་ལ་”ཆབ་འགག་”ཅེས་པའི་ཡུལ་མིང་དང་། དཀོན་མཆོག་ཚེ་བརྟན་གཅིག་གི་ སྔོན་ལ་”གཉའ་གོང་”ཞེས་པའི་ཡུལ་མིང་སྣོན་དགོས་བྱུང་ཡོད།

དེང་སང་སྐྱེས་མིང་གི་སྔོན་ལ་ཡུལ་མིང་འགོད་སྟངས་ལ་འགྱུར་བ་གཉིས་འགྲོ་བཞིན་ཡོད། གཅིག་ནི་ཡུལ་མིང་དང་སྐྱེས་མིང་གཉིས་ཀྱི་བར་ལ་སྲོལ་རྒྱུན་གྱི་ཡིག་ཚེག་མ་འབྲི་བར། ཚེག་ཐིག་ཆེན་པོ་འདི་འདྲ་ཞིག་ཡུལ་མིང་དང་སྐྱེས་མིང་གཉིས་བར་གྱི་ཡིག་སྐེད་དུ་རྒྱག་པ་དེ་ཡིན། དཔེར་ན་ཞོ་འོང་སྐལ་བཟང་རྒྱ་མཚོ་ནི་ཞོ་འོང་སྐལ་བཟང་རྒྱ་མཚོར་འབྲི། འདི་ནི་དང་པོ་རྒྱ་ནག་གིས་ནུབ་ཕྱོགས་རྒྱལ་ཁབ་ཀྱིས་གཙོས་པའི་ཕྱི་རྒྱ ལ་གྱི་རྩོམ་པ་པོའི་མིང་རྒྱ་སྐད་དུ་སྒྲ་འབེབས་བྱེད་ལུགས་དེ་ལ་ལད་ཟློས་བྱས་ནས་བྱུང་བ་ཡིན། ཕྱི་རྒྱལ་གྱི་མི་མིང་གི་སྐྱེས་མིང་དང་རུས་མིང་ངམ་ཁྱིམ་མིང་གཉིས་ཀྱི་བར་མཚམས་འབྱེད་ཆེད་ཚེག་ཐིག་ཆེན་པོ་འདི་བཀོད། ཡང་དབྱིན་ཡིག་གི་སྒྲ་ཁྱིམ་གཅིག་ཡིན་པའི་མིང་ཞིག་རྒྱ་སྐད་དུ་འབེབ་སྐབས་སྒྲ་ཁྱིམ་གཉིས་སུ་འབབ། དཔེར་ན་དབྱིན་ཡིག་གི་Johnཟེར་བ་འདི་སྒྲ་ཁྱིམ་གཅིག་ཡིན་པ་ལ། རྒྱ་ཡིག་ཏུ་ཕབ་སྐབས་ཡོ་ཧན་ཟེར་བ་ལྟ་བུའི་སྒྲ ་ཁྱིམ་གཉིས་སུ་འབབ་པ་དེ་གཉིས་མཉམ་ཀློག་གམ་མགྱོགས་ཀློག་བྱེད་དགོས་པ་སྟོན་ཆེད་ཚེག་ཐིག་འདི་རྒྱག

རྒྱ་ཡིག་གི་ཕྱི་རྒྱལ་མི་མིང་གི་བར་དུ་འགོད་པའི་ཚེག་ཐིག་ཆེན་པོ་བོད་མིང་གི་ནང་དུ་བླངས་ཡོད་ན་ཡང་། དེའི་རྒྱུ་མཚན་ནི་ལེན་ཐབས་མེད་པ་ཞིག་ཡིན། རྒྱ་ཡིག་གིས་དེ་ལྟར་བྱེད་དོན་ནི་མི་རིགས་གཞན་གྱི་མིང་སྲོལ་དང་སྒྲ་ཇི་བཞིན་དུ་རང་སྐད་དུ་འདྲེན་མ་ཐུབ་པའི་འུ་ཐུག་ཐབས་ཟད་ཀྱི་བྱེད་སྟངས་ཤིག་རེད། ང་ཚོའི་རྩོམ་པ་པོ་རྣམས་ཀྱིས་ཚེག་ཐིག་བོད་མིང་བོད་ཡིག་ཏུ་འབྲི་བ་ཡིན་ལ། དེ་ཀློག་མཁན་ཡང་བོད་པ་རྣམས་ཡིན་སྟབས། སྤྱིར་བཏང་ཡུལ་མིང་དང་རང་མིང་གཉིས་ཀློག་ནོར་དང་གོ་ནོར་འབྱུང་བ་ནི་མི་སྲིད་པ་ཞིག་ཡིན།

འགྱུར་བ་གཞན་པ་ཞིག་ནི་ཡུལ་མིང་གི་ཆ་དེ་སྒྲ་ཁྱིམ་གཅིག་ཅན་དུ་འགྱུར་བཞིན་པ་དེ་ཡིན། དཔེར་ན། གཅན་ཚ་ཟེར་བའི་ཡུལ་གྱི་སྙན་ངག་མཁན་སྨྱུག་མིང་ལ་མེ་སྟ ག་དང་རང་སད་དུ་འབོད་པ་གཉིས་ནས གཅན་མེ་སྟག་དང་གཅན་རང་སད་ཅེས་འབོད་པ་ལྟ་བུ་ཡིན། སྔོན་མ་རུས་མིང་མང་པོ་སྒྲ་ཁྱིམ་གཅིག་ཅན་ཡིན་སྟབས་རང་མིང་གི་ སྔོན་དུ་རུས་མིང་འགོད་སྐབས་སྒྲ་ཁྱིམ་གཅིག་ཅན་མང་པོ་འབྱུང་། ལྷག་པར་དུ་བོད་བཙན་པོའི་སྐབས་དང་བསྟན་པ་ཕྱི་དར་གྱི་འགོ་ཙམ་ལ་མཚན་དེ་འདྲ་མང་། དཔེར་ན་རྔོག་ བློ་ལྡན་ལེགས་པའི་ཤེས་རབ་ཀྱི་རྔོག་ལྟ་བུ་ཡིན། དེ་བཞིན་སྔ་མོའི་དུས་སུ་རང་མིང་གི་སྔོན་ལ་ཡུལ་མིང་སྒྲ་ཁྱིམ་གཅིག་ཅན་ཡང་འགའ་རེ་མཐོང་རྒྱུ་ཡོད་ཀྱང་། དེ་དག་ལས་མང་ཆེ་བ་ཡུལ་མིང་སྒྲ་ཁྱིམ་གཅིག་ཡིན་ནས་ད་ལྟར་བྱུང་ཡོད།

དུང་དཀར་བློ་བཟང་འཕྲིན་ལས་མཆོག་ནས་རྩོམ་པ་པོས་”ཆོས་ལུགས་ཀྱི་གྲུབ་མཐའ་སོ་སོའི་སྐོར་གྱི་གསུང་རྩོམ་གནང་སྐབས་གྲུབ་མཐའ་དེའི་ཆོས་སྐད་དང་མཐུན་པའི་མཚན་རང་ཉིད་ཀྱིས་འདོགས་པར་མཛད།”ཅེས་”གྲུབ་མཐའི་ཆོས་སྐད་དང་མཐུན་པའི་མིང་”རིགས་འདི་གཅིག་པོ་རྩོམ་པ་པོ་རང་གིས་བཏགས་པ་དང་མིང་རིགས་གཞན་པ་རྣམས་རང་གིས་བཏགས་པ་མིན་ཚུལ་ཤུགས་བསྟན་གནང་ཡོད། དེས་ན་མིང་རིགས་གཞན་པ་དེ་དག་གི་ནང་དུ་རྩོམ་པ་པོ་རང་གི་སེམས་ཁམས་ཀྱི་ཆ་ཤས་ཞུགས་ཐབས་མེད་པ་ནི་སྨོས་མེད་ཡིན། དེང་སང་གི་སྨྱུག་མིང་ཚང་མ་རྩོམ་པ་པོས་རང་གིས་རང་ལ་བཏགས་པ་ཡིན་སྟབས། སྨྱུག་མིང་གི་ནང་དུ་རྩོམ་པ་པོའི་སེམས་ཁམས་ཀྱི་ཆ་ཤས་རེ་གང་ཐུབ་ཀྱིས་མཚོན་ཐབས་བྱས་ཡོད། སྨྱུག་མིང་གི་ཐོག་ནས་སྙན་ངག་པ་རྣམས་ཀྱི་སེམས་ཁམས་ཀྱི་ཆ་ཤས་སམ་ཁོང་ཚོའི་བློ་ཁ་ཁྱེར་ཕྱོགས་རེ་མངོན་ཡོད སྟབས། སྨྱུག་མིང་མིང་ལ་དབྱེ་ཞིག་བྱེད་རིན་ཡོད་པ་ཞིག་ཡིན།


རྩོམ་འདིའི་ནང་མཆན་ 2 བཀོད་འདུག

2 Responses to “མི་རབས་གསར་པའི་སྙིང་ཁམས་ཀྱི་འཕར་ལྡིང་།”གི་ཁ་སྐོང་འགའ།(༤)

  1. ས་ལེ་སྦྲམ་ ནས།

    ཡག་པོ་བྲིས་འདུག ཡིན་ཡང་། ༼སྨྱུག་མིང་ངམ་པིར་མིང་༽འདི་ང་ཚོ་བོད་ལ་དུས་ནམ་ཞིག་ནས་དར་སྲོལ་བྱུང་བ་དང་། དེ་ཡང་གང་འདྲ་བྱས་ནས་ཁྱབ་བརྡལ་དུ་ཕྱིན་པ་སོགས་ལ་ད་དུང་ཡང་ཁ་ཚོན་གཅོད་དཀའ་བར་སེམས། སྔོན་བྱོན་མཁས་པ་དག་གིས་གསང་བའི་མཚན་བྱང་བཀོད་པའི་འཕྲིན་ཡིག་དང་དགག་ལན་སོགས་ཕན་ཚུན་ལ་བསྐུར་བའི་ལོ་རྒྱུས་མང་དུ་བཤད་རྒྱུ་ཡོད། དུས་རབས་མང་བོའི་ཡར་སྔོན་ནས་བོད་ལ་དོན་གྱིས་༼ སྨྱུག་མིང་ངམ་པིར་མིང་༽བེད་སྤྱོད་གཏོང་བའི་སྲོལ་བྱུང་འདུག སྐབས་དེ་ཤེད་ཅིག་ལ་བཀོལ་སྤྱོད་བྱས་མྱོང་བའི་༼ གསང་མིང་༽འདི་ལོ་རབས་བརྒྱད་བཅུ་བ་ནས་ཁྱབ་བརྡལ་ཤུགས་ཆེར་ཕྱིན་པའི་ད་ལྟའི་༼སྨྱུག་མིང་ངམ་པིར་མིང་༽འདིའི་ས་བོན་ནམ་འབྱུང་ཁུངས་ལྟ་བུ་ཡིན་ན་ཅིས་མི་ཆོག གསང་མིང་འདི་དང་གོང་དུ་དུང་དཀར་ཚང་གིས་གསུང་བའི་གསང་མཚན་ཞེས་པ་གཉིས་གཏན་ནས་མི་འདྲ།
    བོད་ཀྱི་མིང་འདོགས་སྟངས་ལའང་གོང་དུ་བཤད་པ་དེ་དག་གི་ནང་དུ་མ་འདུས་པ་ད་དུང་རེ་ཟུང་ལྷག་འདུག བོད་ལ་མཚང་འདོགས་ཀྱི་མིང་བརྡ་སྦྱོར་སྲོལ་སྔར་ནས་དར་ཡོད་པ་ཞིག་རེད། དཔེར་ན་གླང་དར་མ་ཞེས་པ་ལྟ་བུ་རེད། ད་རུང་གཅེས་མིང་ངམ་གཅེས་འབོད་༼ཨ་མདོའི་ས་ཁུལ་འགའ་ནས་གཅེས་འབོད་ཟེར༽ཅེས་པ་ཞིག་ཀྱང་བོད་ཆོལ་ཁ་གསུམ་གྱི་ཁྱོན་ཡོངས་ལ་ས་དར་རྡོ་དར་ཡིན། ད་དུང་ཕ་མིང་དང་མ་མིང་། ཁྱིམ་རྒྱུད་ཀྱི་མིང་རྣམས་རང་གི་སྐྱེས་མིང་གི་མགོ་ལ་སྦྱར་ནས་འདོགས་སྲོལ་ཞིག་ཀྱང་གནའ་སྔ་མོ་ནས་ད་ལྟའི་བར་དུ་གནས་ཡོད་པ་རེད། བསམ་ཚུལ་ཙམ་ཡིན། ནོར་ཡོད་ན་དགོངས་དག གསེར་ས་ལེ་སྦྲམ་ནས

  2. པད་མ་འབུམ་ལགས་ཀྱིས་ཡག་པོ་བྲིས་འདུག ཡིན་ཡང་། ༼སྨྱུག་མིང་ངམ་པིར་མིང་༽འདི་ང་ཚོ་བོད་ལ་དུས་ནམ་ཞིག་ནས་དར་སྲོལ་བྱུང་བ་དང་། དེ་ཡང་གང་འདྲ་བྱས་ནས་ཁྱབ་བརྡལ་དུ་ཕྱིན་པ་སོགས་ལ་ད་དུང་ཡང་ཁ་ཚོན་གཅོད་དཀའ་བར་སེམས། སྔོན་བྱོན་མཁས་པ་དག་གིས་གསང་བའི་མཚན་བྱང་བཀོད་པའི་འཕྲིན་ཡིག་དང་དགག་ལན་སོགས་ཕན་ཚུན་ལ་བསྐུར་བའི་ལོ་རྒྱུས་མང་དུ་བཤད་རྒྱུ་ཡོད། དུས་རབས་མང་བོའི་ཡར་སྔོན་ནས་བོད་ལ་དོན་གྱིས་༼ སྨྱུག་མིང་ངམ་པིར་མིང་༽བེད་སྤྱོད་གཏོང་བའི་སྲོལ་བྱུང་འདུག སྐབས་དེ་ཤེད་ཅིག་ལ་བཀོལ་སྤྱོད་བྱས་མྱོང་བའི་༼ གསང་མིང་༽འདི་ལོ་རབས་བརྒྱད་བཅུ་བ་ནས་ཁྱབ་བརྡལ་ཤུགས་ཆེར་ཕྱིན་པའི་ད་ལྟའི་༼སྨྱུག་མིང་ངམ་པིར་མིང་༽འདིའི་ས་བོན་ནམ་འབྱུང་ཁུངས་ལྟ་བུ་ཡིན་ན་ཅིས་མི་ཆོག གསང་མིང་འདི་དང་གོང་དུ་དུང་དཀར་ཚང་གིས་གསུང་བའི་གསང་མཚན་ཞེས་པ་གཉིས་གཏན་ནས་མི་འདྲ།
    བོད་ཀྱི་མིང་འདོགས་སྟངས་ལའང་གོང་དུ་བཤད་པ་དེ་དག་གི་ནང་དུ་མ་འདུས་པ་ད་དུང་རེ་ཟུང་ལྷག་འདུག བོད་ལ་མཚང་འདོགས་ཀྱི་མིང་བརྡ་སྦྱོར་སྲོལ་སྔར་ནས་དར་ཡོད་པ་ཞིག་རེད། དཔེར་ན་གླང་དར་མ་ཞེས་པ་ལྟ་བུ་རེད། ད་རུང་གཅེས་མིང་ངམ་གཅེས་འབོད་༼ཨ་མདོའི་ས་ཁུལ་འགའ་ནས་གཅེས་འབོད་ཟེར༽ཅེས་པ་ཞིག་ཀྱང་བོད་ཆོལ་ཁ་གསུམ་གྱི་ཁྱོན་ཡོངས་ལ་ས་དར་རྡོ་དར་ཡིན། ད་དུང་ཕ་མིང་དང་མ་མིང་། ཁྱིམ་རྒྱུད་ཀྱི་མིང་རྣམས་རང་གི་སྐྱེས་མིང་གི་མགོ་ལ་སྦྱར་ནས་འདོགས་སྲོལ་ཞིག་ཀྱང་གནའ་སྔ་མོ་ནས་ད་ལྟའི་བར་དུ་གནས་ཡོད་པ་རེད། བསམ་ཚུལ་ཙམ་ཡིན། ནོར་ཡོད་ན་དགོངས་དག གསེར་ས་ལེ་སྦྲམ་ནས

Write a Reply or Comment

Your email address will not be published. Required fields are marked *

*