ནམ་མཁའ་བྱིའུ་བདའ།

རིག་འབྱུང་དོན་གྲུབ་བཀྲ་ཤིས།

དབྱིན་ཡིག་གི་འགྱུར་ལ་གཟིགས་ན་འདི་རུ་བསྣུན།

ནམ་མཁའ་བྱིའུ་བདའ་ནི་ངའི་ཆུང་དུས་ཀྱི་རྩེད་གྲོགས་ཤིག་ཡིན། ང་ནམ་མཁའ་བྱིའི་བདའ་ལ་མ་ཐུག་པར་ལོ་ངོ་བཅུ་གྲངས་ཕྱིན་འདུག ལོ་ངོ་མང་པོ་ཕྱིན་པའི་དེ་རིང་ཡང་ངའི་སེམས་སུ་ཆུང་དུས་ཀྱི་འཚོ་བ་དེ་ཚོ་ཁྲ་ལེམ་མེར་འདུག ང་ཆུང་ངུའི་དུས་སུ། ནམ་མཁའ་བྱིའུ་བདའ་དང་མཉམ་དུ་བྱིའུ་བདའ་རུ་ཐེངས་མང་འགྲོ་མྱོང་། ནམ་མཁའ་བྱིའུ་བདའི་མིང་དངོས་ལ་ནམ་མཁའ་ཚེ་རིང་ཟེར། ནང་མི་དང་གྲོགས་པོ་ཚོས་ཁོང་གི་མིང་ལ་ནམ་མཁའ་ཞེས་འབོད། སྡེ་མི་རྣམས་ཀྱིས་ཁོང་གི་མིང་ལ་ནམ་མཁའ་བྱིའུ་བདའ་ཞེས་འབོད། རྒྱུ་མཚན། ཁོང་ཆུང་ངུའི་དུས་ནས་བྱིའུ་བདའ་བར་ཧ་ཅང་དགའ། 
ང་ཚོའི་གྲོང་པའི་བྱིས་བ་རྣམས་ཀྱང་བྱིའུ་བདའ་བར་དགའ། དབྱར་གནང་གི་སྐབས་སུ་ང་ཨ་ཕའི་མཉམ་དུ་ཕ་ཡུལ་ལ་སོང་། དབྱར་གནང་གི་དུས་ཚོད་ཕལ་ཆེ་བ་བྱིའུ་བདའ་ནས་རྫོགས། ཉིན་གང་བོར་ནམ་མཁའ་བྱིའུ་བདའ་དང་མཉམ་དུ་བྱིའུ་བདའ་རུ་ཕྱིན། མཚམས་རེར་ཉིན་གང་བོར་བྱིའུ་གཅིག་ཀྱང་འཛིན་མི་ཐུབ། མཚམས་མཚམས་ལ་བྱིའུའི་རྗེས་ལ་རྒྱུག་ནས་ཁྱིམ་ཚང་གཞན་པའི་ཞིང་ཁའི་ནང་དུ་རྐང་རྗེས་མང་པོ་ཕབ། ཞིང་བདག་གིས་དེ་མཐོང་ནས་ངེད་ཚོའི་ཕ་མ་རྣམས་ལ་ལབ། ཕ་མ་རྣམས་ཀྱི་རྩ་ནས་ང་ཚོར་ཉེས་རྡུང་རག། དུས་སྐབས་སུ་ཉེས་རྡུང་དེ་འདྲ་བ་ནི། ཉིན་གཅིག་གི་ནང་ན་ཐེངས་རེ་ཙམ་ཉུང་མཐར་ཡང་ཡིན།

གལ་སྲིད། ཉིན་གཅིག་གི་ནང་ལ་བྱིའུ་ཕྲུག་མང་པོ་འཛིན་ཐུབ་པ་ཡིན་ན་། བྱིའུ་ཕྲུག་རྣམས་ང་ཚོ་ནང་ཁུལ་ལ་བགོ་བཤའ་རྒྱག་གི་རེད། ནམ་མཁའ་བྱིའུ་བདའ་རྟག་པར་ང་ཚོའི་དཔོན་པོ་རེད། བྱིའུ་བདའ་བའི་སྐབས་སུ་ཁོང་གི་བཀོད་འདོམས་ལ་ཚང་མས་ཉན་གི་རེད། བྱིའུ་ཕྲུག་རྣམས་བཟུང་ཚར་བའི་རྗེས་སུ། ཁོང་གིས་བྱིའུ་ཕྲུག་ཡག་ཤོས་དེ་བདམས་ཀྱི་རེད། དེའི་རྗེས་ནས་ང་ཚོས་འདེམས་ཀྱི་རེད། ང་ཚོས་རང་ལ་ཐོབས་པའི་བྱེའ་ཕྲུག་རྣམས་འཁྱེར་ནས་ནང་ལ་ལོགས། ནང་ལ་མ་སླེབས་པའི་སྔོན་ལ་བྱིའུ་ཕྲུག་དེ་དག སོ་སོའི་ནང་གི་ཉེ་ས་ཞིག་ལ་སྦས། མཚམས་རེར་ཚེར་གསེང་ལ་སྦས་འཇོག་གི་རེད། བྱིའུ་ཕྲུག་མང་ཆེ་བ་སང་ཉིན་ཞོགས་པ་ཤི་ཚར་ཡོད། ད་ལྟ་བསམ་ན། ཆུང་བྱིས་བའི་སྐབས་སུ། སྡུག་པའི་ལས་ཀྱང་མང་པོ་བསགས་འདུག་བསམ། 


ཉིན་ཞིག་ནམ་མཁའ་བྱིའུ་བདའ་དང་མཉམ་དུ་ང་ཚོ་བྱིའུ་བདའ་རུ་ཕྱིན། ནམ་མཁའ་བྱིའུ་བདའི་ལག་ཏུ་ཐག་པ་རིང་པོ་ཞིག་འཁྱེར་འདུག ང་ཚོ་བྲག་ཆུང་ཆུང་གི་འགྲམ་ལ་སླེབས། དེ་རུ་བྱིའུ་ཚང་ཡོད་པ་ང་ཚོས་སྔ་མོ་ནས་ཤེས། འོན་ཀྱང་། ང་ཚོས་བྱིའུ་ཚང་དེ་བསྔོགས་མྱོང་མེད། བྱིའུ་ཚང་དེ་བྲག་ཆུང་ཆུང་དེའི་་སྐེད་མཚམས་ཤིག་ལ་ཡོད། ཉིན་དེར། ནམ་མཁའ་བྱིའུ་བདས། “དེ་རིང་ང་ཚོས་བྱིའུ་ཚང་འདི་བསྔོགས་”ཟེར། ང་ཚོས་མོས་མཐུན་བྱས། འོན་ཀྱང་། སུ་བྲག་ངོས་ལ་འབྱར་མིན་ལ་ཐག་གཅོད་མ་བྱས། ང་ཚོས་གྲོས་བསྡུར་བྱས། བྲག་ངོས་ལ་ང་འབྱར་གྱི་ཡིན་ཟེར་མཁན་གཅིག་ཀྱང་མ་བྱུང་། ཚང་མས་ནམ་མཁའ་བྱིའུ་བདའི་ངོ་ལ་བལྟས། ཚང་མས་ནམ་མཁའ་བྱིའུ་བདའ་བྲག་ངོས་ལ་འབྱར་ན་བསམ། མཐའ་མ་དེར། ནམ་མཁའ་བྱིའུ་བདའ་བྲག་ངོས་ལ་འབྱར་རྒྱུ་བྱས། ང་ཚོས་ནམ་མཁའ་བྱིའུ་བདའི་སྐེད་པ་་ཐག་པས་བསྡམས།་ ང་ཚོ་བྲག་ཆུང་ཆུང་དེའི་སྒང་ལ་ཕྱིན། ང་ཚོར་ཁྱོན་གྲོགས་པོ་དྲུག་ཡོད། ང་ཚོ་གྲོགས་པོ་གསུམ་གྱིས་ཐག་པའི་སྣེ་མོ་བཟུང་། ག་ལེར་ག་ལེར་། ནམ་མཁའ་བྱིའུ་བདའ་བྲག་ངོས་སུ་མར་བསྣར། རོགས་པ་གཞན་གཉིས་བྲག་གི་གཤམ་ལ་ཕྱིན་། གལ་སྲིད་ནམ་མཁའ་བྱིའུ་བདའ་མར་ཟགས་པ་ཡིན་ན། ཁོང་གཉིས་ཀྱིས་གཤམ་ནས་སྐྱོབས་རྒྱུའི་སྟ་གོན་བྱས། ང་ཚོ་གྲོགས་པོ་གསུམ་གྱིས་བྲག་ཆུང་དེའི་སྒང་ནས་ཐག་པའི་སྣེ་མོ་དམ་པོར་བཟུང་། བྲག་གཤམ་ལ་སྡོད་མཁན་གཉིས་ཀྱིས་སྐད་བརྒྱབ་ནས། “ད་དུང་ཐག་པ་མར་ཅུང་ཙམ་བསྣོར་”ཟེར། ང་ཚོས་ཀྱང་ག་ལེར་ག་ལེར་ཐག་པ་ལག་ནས་བསྣར། ” ད་དུང་ཅུང་ཙམ་མར་སྣོར་དང་བྱིའུ་ཚང་གི་སྒོ་ལ་སླེབས་གྲབས་འདུག་”ཟེར། ང་ཚོས་ཡང་བསྐྱར་ཐག་པ་ལག་ནས་ག་ལེར་ག་ལེར་བཏང། ང་ཚོ་སྒང་དུ་འདུག་མཁན་ཚོས་ཀྱང་། མར་སྐད་བརྒྱབ་ནས་། ” ད་འགྲིག་སོང་ངམ། བྱིའུ་ཚང་གི་སྒོ་ལ་སླེབས་སོང་ངམ་”ཞེས་དྲིས། “ད་དུང་ཅུང་ཙམ་མར་བསྣོར་”ཟེར།” ཨོ། ད་རག་སོང་རག་སོང་”ཟེར། ནམ་མཁའ་བྱིའུ་བདས་ཀྱང་སྐད་བརྒྱབ་།

གློ་བུར་དུ། གྲོགས་པོ་མཇུག་མ་དེས་ལག་ནས་ཐག་པ་ཤོར། ང་དང་ངའི་རྒྱབ་ཀྱི་གྲོགས་གཉིས་ཀ་ནམ་མཁའ་བྱིའུ་བདའི་གཟུགས་པོའི་ལྗིད་ཤུགས་ཀྱིས་མར་འཐེན། “ནམ་མཁའ་ཟགས་”སོང་། ངེད་གཉིས་ཀྱིས་ཀྱང་ཁ་ནས་རང་དབང་མེད་པར་སྐད་དེ་ཤོར་བཞིན་ཐག་པ་ལག་ནས་གློད། བྲག་གཤམ་གྱི་གྲོགས་པོ་གཉིས་ཀས་སྐད་བརྒྱབ། ང་ཚོ་བྲག་གཤམ་ལ་རྒྱུགས། ང་ཚོ་ཚང་མ་དངངས་སྐྲག་གི་ཀློང་ལ་ཚུད། ནམ་མཁའ་བྱིའུ་བདས། “ཨ་བ་ཨ་མ། ཨ་བ་ཨ་མ། “ཟེར་ཞོར་ལ་རྐུབ་སྐྱོར་བཞིན་སྐད་ཅོར་བརྒྱབ། ངས་གྲོགས་པོ་གཞན་དེར་། “ཐག་པ་ལག་ནས་གློད་མཁན་ཁྱོད་ཡིན་”ལབ། གྲོགས་པོས་”ང་མིན་ཁོང་རེད་”ལབ། ང་ཚོས་ཐག་པ་གློད་མཁན་སུ་ཡིན་མིན་གྱི་སྒང་ལ་ཁ་རྩོད་བརྒྱབ། ང་ཚོའི་ཁ་རྩོད་ཆེ་རུ་ཕྱིན། ང་ཚོའི་ཁ་རྩོད་ཆེ་རུ་ཕྱིན་ནས་ལག་འཛིང་བྱེད་འགོ་ཚུགས།


ནམ་མཁའ་བྱིའུ་བདའ་ངར་ལངས། ” ཨ་བ་ཨ་མ། ཁྱེད་ཚོ་རྡུང་རེས་བརྒྱབ་ནས་ཅི་བྱེད། སང་ཉིན། ཁྱེད་ཚོ་ངའི་མཉམ་དུ་ཡོང་མི་དགོ། ཁྱེད་ཚོ་སུ་ལ་ཡང་བྱིའུ་ཕྲུག་མེད། དེ་རིང་གི་ཆད་པ་། བྱིའུ་ཕྲུག་གཉིས་གཉིས་བཟུང་ནས་ང་ལ་འཁྱེར་ཤོག་”ཟེར། ང་ཚོའི་ཁ་རྩོད་དང་ལག་འཛིང་གཉིས་ཀ་མཚམས་ཆད། ང་ཚོ་ཚང་མ་ཁུ་སིམ་མེར་སོ་སོའི་ནང་ལ་ཕྱིན། ལག་ཏུ་བྱིའུ་ཕྲུག་མེད་པར་ནང་ལ་ཕྱིན།

ཕྱི་ལོ་༢༠༡༠ལོའི་ཟླ་༣པའི་ཚེས་༧ཉིན་བྲིས།
སྤྱི་ལོ་༢༠༡༣ལོའི་ཟླ་༢པའི་ཚེས་༢༣ཉིན་བསྐྱར་བཅོས་གྲུབ།


རྩོམ་འདིའི་ནང་མཆན་ 2 བཀོད་འདུག

2 Responses to ནམ་མཁའ་བྱིའུ་བདའ།

  1. ཀླུ་སྨྱོན་ ནས།

    རྒྱོ་མིག་ཆེ་ཙམ་གདོངས་དང་། མཛེས་མའི་འདོམ་བར་མ་གཏོགས་ཡིག་ནོར་མི་མཐོང་བ་ཅི་རེད། མགོ་ནས་བྱེའུ་བདག་ཅེས་བྲིས་འདུག

  2. ཀླུ་སྨྱོན་ ནས།

    ཚེ་ཏན་ཞབས་དྲུང་གི་འཁྲུངས་ཡུལ་ན་རྒྱ་ཡིག་མ་གཏོགས་བོད་ཡིག་སློབ་ཀྱི་མི་འདུག འདི་ཕངས་པ་ལ།
    http://www.qhtb.cn/qhtv/xzh/2014/07-26/8665.html

Write a Reply or Comment

Your email address will not be published. Required fields are marked *

*