སྒོ་འབྱེད་པ་དང་རྒྱལ་ཞེན་པ། བྷ་བྷུ་མཐར་ཕྱིན་ལགས་སུ་བཅར་འདྲི།

Mirror

(ཕྱི་ལོ་༡༩༧༥ལོའི་བོད་གནས་བསྐྱར་ཞིབ་སྟེང་བཀོད།)


བཅར་འདྲི་བྱེད་མཁན། མཁས་དབང་ཟླ་བ་ནོར་བུ།

བསྒྱུར་མཁན། རིག་འབྱུང་དོན་གྲུབ་བཀྲ་ཤིས།

དྲི་བ།

ཁྱེད་རང་སྒོ་འབྱེད་པ་ཞིག་ལ་མཚོན་ན། “ཡུལ་ཕྱོགས་སོ་སོའི་གསར་འགྱུར་མེ་ལོང་”འདི་ཐོག་མར་འདོན་དུས་དཀའ་ངལ་མང་པོ་འཕྲད་སོང་ངམ།


ལན།
རེད། དཀའ་ངལ་མང་པོ་འཕྲད་སོང་། ཡིན་ན་ཡང་། ང་དེ་ཚོར་དགའ་སྣང་ཡོད། ངས་ཐོག་མར་བོད་ཡིག་གི་གསར་འགྱུར་འདོན་དུས། རྗེས་སུ་སོ་སོ་སྒེར་ངོས་ནས་བོད་ཡིག་གི་ཚགས་པར་འདོན་མཁན་བལ་བོའི་གྲོགས་པོ་ཞིག་གིས། “ག་རེ་བྱས་ནས་ཁྱེད་ཀྱིས་དངུལ་འཕྲོ་བརླག་ལ་གཏོང་གི་ཡོད་དམ། འདི་ལ་མ་འོངས་པཡོད་མ་རེད།” ཞེས་སྨྲས་བྱུང་། འོན་ཀྱང་། ཕྱི་ལོ་༡༩༢༥ ལོའི་ཟླ་བཅུ་བའི་ནང་། ཐོག་དང་པོར་ངས་ཚགས་པར་གྲངས་ལྔ་བཅུ་ཙམ་དཔར་བཏབ་ནས་ལྷ་སར་ཡོད་པའི་རང་གི་གྲོགས་པོ་ཚོར་བསྐུར་བ་ཡིན། རྒྱལ་དབང་སྐུ་ཕྲེང་བཅུ་གསུམ་པ་ལ་ཡང་བསྐུར་བ་ཡིན། ཁོང་ཧ་ཅང་ཐུགས་དགྱེས་ཚོར་ཆེན་པོ་བྱུང་འདུག ཁོང་གིས་ང་ལ་འཕྲིན་ཡིག་ཞིག་དང་མཉམ་དུ་ཐུགས་རྗེ་ཆེ་མཚོན་པའི་ལག་རྟགས་འགའ་བསྐུར་འདུག་པ་མ་ཟད། མུ་མཐུད་ནས་ཚགས་པར་འདོན་དགོས་བའི་སྐུལ་མ་གནང་འདུག

དྲི་བ།

བོད་ཐོག་སྤེལ་བའི་ཚགས་པར་དེ་དང་འབྲེལ་ནས། ཁྱེད་རང་༧རྒྱལ་དབང་སྐུ་ཕྲེང་བཅུ་གསུམ་པ་དང་འབྲེལ་འདྲིས་གཏིང་ཟབ་བྱུང་ཡོད་པ་རེད། དེས་ན། ཁྱེད་རང་གི་ངོས་ནས་ཁོང་ལ་ལྟ་སྟངས་དང་ཁོང་གི་བྱས་རྗེས་གཙོ་བོ་ཅི་ཞིག་རེད་བསམ་གི་འདུག

ལན།
ཁོང་ནི་ཧ་ཅང་སྒམ་ཚུགས་ཅན་ཞིག་རེད། ཁྱེད་རང་ཕྱི་རྒྱལ་བ་ཞིག་ཡིན་པའི་དབང་དུ་བཏང་རུང་། ཁོང་གི་གདོང་ལ་ཐད་ཀར་བལྟ་ཐུབ་གི་མ་རེད། དབྱིན་ཇིའི་ལས་བྱེད་ཚོར་ཉམས་མྱོང་འདི་གཅིག་མཚུངས་སུ་བྱུང་ཡོད་པ་རེད། ཁོང་ནི་ཧ་ཅང་གཟི་བརྗིད་ཅན་དང་ངར་མ། སྐྱེས་བ་ནས་བཀའ་གཏོང་མཁན། ད་དུང་བློ་གྲོས་ཅན་ཞིག་ཀྱང་རེད། ཁོང་གི་བྱས་རྗེས་གཙོ་བོ་ནི། བོད་ལ་འགྱུར་བ་ཞིག་ངེས་པར་གཏོང་དགོས་བར་འདོད་པ་དང་བོད་འདི་གཞན་འོག་ལ་ཤོར་རྒྱུའི་ཉེན་ཁ་ཡོད་པ་སོགས་ངོས་འཛིན་གསལ་བོ་ཐུབ་པ་དེ་ཡིན་ཞིང་། ཁོང་གིས་སྐུ་ཚེ་ཧྲིལ་བོར། བོད་འདི་དེང་རབས་ཅན་གྱི་ཕྱོགས་སུ་འཁྲིད་པ་དང་བོད་འདི་རྒྱ་འོག་ནས་ཐར་སྟེ་རང་བཙན་གཙང་མའི་རྒྱལ་ཁབ་ཞིག་བྱེད་རྒྱུར་འབད་བརྩོན་གནང་བ་རེད། ཁོང་ལ་རྒྱ་ནག་དང་ཞི་འགྲིག་བྱེད་འདོད་ཡོད་མོད། རྒྱ་ནག་གི་འོག་ཏུ་སྡོད་འདོད་མེད་པ་རེད། ད་ལྟའི་ཏཱ་ལའི་བླ་མ་ཡང་སྐུ་སྔོན་མའི་བཏིངས་བའི་ལམ་ཐིག་འདིའི་སྒང་དུ་སྙེག་འདོད་ཡོད་པ་འདྲ་ཞིག་འདུག

དྲི་བ།

རྒྱ་ནག་གིས་བོད་བཙན་བཟུང་བྱས་རྗེས། ཁྱེད་ཀྱིས་ཚགས་པར་རྩོམ་སྒྲིག་བྱེད་སྟངས་ལ་འགྱུར་བ་བཏང་ཡོད་དམ།

ལན།
ངས་འགྱུར་བ་གཏོང་དགོས་བྱུང་བ་རེད། ཨ་རིའི་ཚགས་ཤོག་ཞིག་གིས། ངའི་ལས་ཀ་དེར་ “མོའོ་དང་མི་གཅིག་གི་དམག་འཐབ་” ཞེས་འགྲེལ་བཤད་བརྒྱབ་འདུག ངའི་རྩོམ་སྒྲིག་དང་རྩོམ་ཡིག་གི་ནང་དུ། ངས་རྟག་པར་བོད་ཀྱི་ལོ་རྒྱུས་གཞིར་བཞག་ཐོག། གཙོ་བོ་བོད་ཀྱི་ཆོས་རྒྱལ་ཚོའི་སྐོར་བཤད་ནས་བོད་རང་བཙན་ཡིན་པ་ཁུངས་སྐྱེལ་ཡོད་པའི་སྐོར་བྲིས་ཡོད་། རྒྱ་ནག་གི་བོད་འདི་རྗེས་ལུས་རེད་ཟེར་ནས་བརྗོད་ཀྱི་ཡོད་པ་རེད་། ངའི་རྩོམ་དེ་ཚོའི་ནང་དུ། བོད་རྗེས་ལུས་མིན་པ་མ་ཟད་དེ་ལ་དཔལ་ཡོན་ཡར་ཐོན་ཤུགས་ཆེན་བྱུང་བ་ཡོད་པ་མ་ཟད་ཆ་ཚང་འཛོམས་ཡོད་པ་སོགས་བྲིས་བ་ཡོད་། ངས་ལྷ་སའི་སྐུ་དྲག་ཚོ་རྒྱ་ནག་གི་བསླུ་བྲིད་སྐོར་ཉེན་བརྡ་བཏང་བ་ཡིན། འོན་ཀྱང་། ཁོང་ཚོས་ཉན་མ་སོང། རྒྱ་ནག་དམར་ཤོག་ཚོགས་པ་དེ་ཡང་ཧ་ཅང་སྤྱང་པོ་ཡོད་པ་རེད། ཕྱི་ལོ་༡༩༥༠ལོའི་ཡས་མས་སུ། བཀའ་ལོན་སྦུག་ཏུ་ཁོང་ཚོར་ཚོང་དོན་ཚོགས་པ་ཡོད་རེད་ལ། ཁོང་ཚོས་ང་འགུག་ཐབས་ཀྱི་ཐབས་ཤེས་སྣ་ཚོགས་འཐེན་པ་རེད། སྐབས་ཤིག་ལ་བོད་པའི་སྐུ་དྲག་ཞིག་གིས་ལག་ཏུ་ལེགས་སྐྱེས་འགའ་བསྣམས་ནས་ངའི་རྩར་བཏང་འདུག ཁོང་གིས་ང་ལ། “གལ་སྲིད་ངས་ཚགས་པར་གྱི་རྩོམ་ཡིག་ཁག་ཏུ་རྒྱ་ནག་ལ་སྐྱོན་བརྗོད་ཀྱི་གནས་ཚུལ་སོགས་མ་བཀོད་པར། དེའི་ཚབ་ལ་བོད་ནང་དུ་རྒྱ་ནག་གིས་ཡར་རྒྱས་བཏང་བ་རྣམས་བཀོད་པ་ཡིན་ན། ཁོང་ཚོས་ངའི་ཚགས་པར་འདོན་ཐེངས་རེ་རེ་ནས་གྲངས་ལྔ་བརྒྱ་རེ་མངགས་ཉོ་བྱེད་རྒྱུ་ཡིན་པ་མ་ཟད། ད་དུང་ངའི་ལས་ཀ་ལ་དཔལ་འབྱོར་གྱི་དཀའ་ངལ་མ་འཕྲད་པའི་ཁག་ཐེག་བྱེད་གི་ཡིན”་ ལབ་འདུག འོན་ཀྱང་། ངས་ཁས་ལེན་བྱས་ མེད་།

དྲི་བ།

ཁྱེད་ཀྱིས་སྐུ་ཚེ་ཧྲིལ་བོར་བོད་ཀྱི་སྐད་ཡིག་དང་འབྲེལ་བ་བྱས་ནས་བསྡད་པ་རེད། སྐུ་ཉིད་ཀྱི་བསམ་པར་བོད་ཡིག་ལ་དེང་རབས་ཀྱི་དགོས་མཁོ་དང་བསྟུན་པའི་བཅོས་བསྒྱུར་ཞིག་གཏོང་དགོས་རེད་འདོད་དམ།


ལན།
རེད། ད་ཕན་བཅོས་བསྒྱུར་དེ་འདྲ་བྱས་ཡོད་པ་མ་རེད། ཡིན་ན་ཡང་། ཡང་ནས་ཡང་དུ། ང་འགྱུར་བ་གསར་བའི་རིགས་དང་འབྲེལ་བའི་མིང་ཚིག་དེ་འདྲར་ཐུག་གི་འདུག འོན་ཀྱང་། ངས་བསམ་ན་བོད་ཡིག་ལ་བཅོས་བསྒྱུར་གཏོང་དགོས་མི་འདུག གལ་སྲིད་བརྗོད་པས་དོན་དག་དེ་སྟོན་ཐུབ་གི་ཡོད་ན་འགྲིག་གི་རེད་། ལོ་ཁ་ཤས་ཀྱི་གོང་དུ། འབྲུག་གི་སྲིད་བློན་འདས་པོ་འཇིགས་མེད་རྡོ་རྗེ་ནས་བོད་ཡིག་གི་བརྡ་སྤྲོད་དང་དག་ཆའི་སྐོར་ལ་བཅོས་བསྒྱུར་ཞིག་གཏོང་རྩིས་བྱས་བ་རེད། ཚང་མ་སྐད་དང་བསྟུན་ནས་འབྲི་སྲོལ་བྱས་བ་རེད། ཁོང་གིས་རྒྱལ་བོའི་མོས་མཐུན་ལ་མ་བསྟུན་པར། འབྲུག་ཡུལ་གྱི་སློབ་གྲྭ་ཁག་གི་ཀློག་དེབ་ལ་བཅོས་བསྒྱུར་དེ་གཏོང་དགོས་བའི་བཀའ་བཏང་བ་རེད། འཇིགས་མེད་རྡོ་རྗེས་ངས་ཁོང་གི་བྱེད་སྟངས་དེར་བཟོད་སྒོམ་བྱེད་མི་ཐུབ་པ་མ་ཟད་དེབ་རྣམས་དཔར་བསྐྲུན་གྱི་མཐུན་གྲོགས་ཀྱང་མི་སྦྱར་བ་མཁྱེན་གི་ཡོད་རེད། ཀློག་དེབ་གསར་བ་དེ་དག་དཔར་ཁང་ཆུང་ཆུང་ཞིག་ནས་དཔར་བསྐྲུན་བྱས་འདུག ཀློག་དེབ་གསར་བ་དེའི་འདྲ་བཤུས་ཤིག་རྒྱལ་བོ་ལ་སྤྱན་འབུལ་བྱས་བ་རེད། རྒྱལ་བོ་ཧ་ཅང་ཐུགས་ཁྲོས་བ་མ་ཟད་རབ་བྱུང་བ་རྣམས་ཀྱང་ཁོང་ཁྲོ་ལངས་འདུག རྒྱལ་བོས་ཀློག་དེབ་གསར་པ་དེ་ཚོ་རྩ་མེད་བཟོ་བའི་བཀའ་བཏང་འདུག དེ་ལ་བརྟེན་ནས། པར་ཁང་རང་དུ་ཀློག་དེབ་སྟོང་ཕྲག་བཅུ་མེ་བསྲེགས་བཏང་འདུག

དྲི་བ།

མཐའ་མ་དེར། ངས་ཁྱེད་རང་སྒེར་དང་འབྲེལ་བའི་དྲི་བ་ཞིག་བཏང་ཆོག་གམ། ངའི་མཐོང་སྣང་ལ། བོད་མི་ཞིག་ཡེ་ཤུ་བ་ཆགས་ན་་ཁོང་བོད་པའི་སྤྱི་ཚོགས་ནང་ཁེར་རྐྱང་ལྟ་བུ་ཆགས་འགྲོ་གི་འདུག འོན་ཀྱང་། ཁྱེད་ཀྱིས་བོད་པའི་སྤྱི་ཚོགས་ཁྲོད་དོན་དང་ལྡན་པའི་གནས་བབ་ཞིག་འཛིན་ཐུབ་ཡོད་པ་མ་ཟད་ཁྱེད་རང་ཡེ་ཤུ་བ་ཞིག་ཡིན་པ་དེས་ཁྱེད་དང་བོད་མི་ཚོའི་འབྲེལ་ལམ་ལ་ཡང་ཤུགས་རྐྱེན་ཡོད་ངེས། དེ་ག་འདྲ་རེད་དམ།


ལན།
ངའི་མི་ཚེ་ཧྲིལ་བོར། ངས་ཡེ་ཤུ་མ་ཤུ་ཀས་གང་གསུངས་བ་དེ་ཉམས་ལེན་བྱེད་ཐབས་ལ་འབད་པ་ཡིན། ངས་ཆང་མི་འཐུང་། ངས་ཐ་མག་མི་འཐེན། ངས་རྫུན་མི་བཤད། ངས་གཞན་ལ་མགོ་སྐོར་མི་གཏོང་། ངས་རྟག་པར་ཕན་ཐོགས་མཁན་ཞིག་ཡོང་བར་འབད་པ་ཡིན། ངའི་མི་ཚེའི་སྟོད་ཀྱི་བོད་མི་ཚོས་ཕལ་ཆེར་ཡེ་ཤུ་བ་ལབ་ན་ཅི་ཞིག་ཡིན་པ་ཡང་གོ་བ་ལོན་གི་ཡོད་མ་རེད་འདོད་། གང་ལྟར། ཁོང་ཚོས་ང་རང་སུ་ཡིན་པ་དེ་ངོས་ལེན་བྱས་བ་རེད། ད་དུང་། ཁོང་ཚོས་ངའི་གཟུགས་པོ་བཀའ་ལོན་སྦུག་ཏུ་ཡོད་ན་ཡང་། ངའི་སེམས་པ་བོད་དང་མཉམ་དུ་ཡོད་པ་མཁྱེན་གི་ཡོད་རེད།

མཆན།
“ཡུལ་ཕྱོགས་སོ་སོའི་གསར་འགྱུར་མེ་ལོང་” གི་པར་ངོས་ཆ་ཚང་ཨ་རིའི་ཀོ་ལིམ་སྦི་ཡ་གཙུག་ལག་སློབ་ཁང་གི་དྲ་ངོས་ནས་གཟིགས་ན་འདི་རུ་བསྣུན།


རྩོམ་འདིའི་ནང་མཆན་བཀོད་མི་འདུག

Write a Reply or Comment

Your email address will not be published. Required fields are marked *

*